Les quemes forestales n'Asturies van a menos cada añu, pero van ser mayores y más intenses y incontrolables

UVIÉU 21 Nov. (EUROPA PRESS) -

El númberu mediu anual de quemes forestales ta amenorgando en prácticamente tol territoriu, pero la superficie quemada va aumentando. Asina, Asturies va hacia un escenariu de quemes cada vez mayores y más intenses y incontrolables.

Ente 1994 y 2008 hubo 829 quemes, mentes qu'ente 2009 y 2022 menguaron hasta 643. Sicasí, la superficie quemada pasó de les 25.000 hectárees en 1997 a les 27.000 en 2017. Per otru llau, pasáronse de 11,6 hectárees quemaes de media por cada fueu en 1994-2008 a les 16,3 en 2009-2022, polo que los datos muestren que'l tamañu de cada fueu individual aumenta.

Asina se recueye nel artículu 'Los paisaxes asturianos énte una nueva xeneración de fueos forestales', de los profesores de la Universidá d'Uviéu José Valentín Roces Díaz, Arturo Colina Vuelta y Susana Suárez Seoane y que se publica nel últimu númberu de la revista 'Ciencies', qu'edita l'Academia de la Llingua Asturiana y la Universidá d'Uviéu.

L'artículu muestra un incrementu na frecuencia de grandes fueos forestales, denominación que s'aplica a los acontecimientos qu'afecten a superficies mayores de 500 hectárees. Asina, nes últimes cuatro décades hubo 72 fueos que se clasificaron dientro d'esta categoría. Sicasí, el 57% foron dende 2010, siendo 2023 l'añu nel que se concentra'l máximu históricu, con un total de 12 quemes --17% del total-- qu'ocurrieron en menos de dos selmanes

Los factores que condicionen un espardimientu del fueu mayor y de manera más rápida tán principalmente vinculaos a los cambios del usu del suelu, al dexar los agroganaderos pa dar pasu al aprovechamientu forestal o l'abandonu. Una situación que llevó, según recueye l'artículu, a una "homoxenización del paisaxe, xenerando grandes mases de pinos y ocalitos con una distribución continua y ensin parada".

La mayoría de les quemes tán causaes por actividaes humanes --menos del 1% de les quemes qu'hubo n'Asturies ente 2009 y 2018 foron por causes naturales (rayos), mentes que'l 61% foron intencionaos y el 22% causaes por accidentes o neglixencies--. Anque'l cambiu climáticu nun provoca qu'haya más quemes n'Asturies, si fai qu'estes sían más peligroses. Asina, la xuba de les temperatures y la duración mayor de los periodos de seca pue ayudar a la velocidá d'espardimientu y intensidá d'un fueu.

SOLUCIONES

L'artículu recueye como les mases forestales autóctones amenorguen les posibilidaes d'espardimientu de los fueos énte les plantaciones monoespecífiques de pinu o ocalitu, "polo que la preservación y promoción de les viesques autóctones n'árees prioritaries del paisaxe pue ser clave pal establecimientu de puntos estratéxicos de xestión".

Per otru llau, énte l'aumentu de les grandes quemes --con fueos que vuelven activase o con dellos focos simultaneos-- nun territoriu urbano-agrario-forestal, proponen una revisión de los protocolos y procedimientos pa distribuyir más eficientemente los recursos.

Asina, pa garantizar la defensa de les poblaciones, amás de la seguridá de los sos habitantes con pautes clares d'enzarru o evacuación, consideren "imprescindible" la concienciación y preparación de la población en situaciones d'emerxencia. Pa la meyora de la so capacidá d'autoprotección proponen "un fortalecimientu de les capacidaes operatives y de prevención nel ámbitu local".