Marcos Rodríguez diz que Conceyu Bable permitió canalizar una reivindicación yá "llatente" na Asturies de la Transición

UVIÉU 7 Nov. (EUROPA PRESS) -

L'historiador Marcos Rodríguez afirmó que l'aparición de l'asociación Conceyu Bable nun pue entendese ensin tener en cuenta que na Asturies de la Transición había "un públicu llatente" que reclamaba propuestes nueves pa la cultura y la llingua asturiana.

Rodríguez indicólo asina esti miércoles nes Xornaes d'Estudiu de l'Academia de la Llingua Asturiana, onde presentó la comunicación 'L'apaición de Conceyu Bable nel so tiempu y espaciu'. Nella, fixo un repasu al contestu social que permitió que nos años setenta del sieglu pasáu naciera l'asociación que ye'l guañu del modernu discursu asturianista.

La aparición de la revista 'Asturias Semanal' concienció a la población, al traviés de reportaxes sobre la situación de la economía rexonal, de la importancia del autogobiernu. Esto xeneró tamién una atención posterior a los aspectos culturales "qu'abonaría'l terrén pal espoxigue del movimientu de defensa de la llingua asturiana".

Nesi sentíu, la publicación na revista d'una sección dedicada a la llingua asturiana titulada 'Conceyu Bable' --y que pol so éxitu foi l'orixe de l'asociación posterior del mesmu nome-- foi una "oportunidá magnífica de poder visibilizar" el discursu asturianista ente la población a favor de la democracia.

"Conceyu Bable alcontró una canal de tresmisión potente de les sos idees que fixo posible la espansión de les mesmes ente parceles demográfiques amplies", según Rodríguez, qu'esplica qu'esto permitió que persones con interés na cultura y na llingua asturiana "tuvieren una referencia clara a la que se dirixir pa entrar en contactu". Too eso al traviés "d'unes idees sobre la llingua d'Asturies coles que s'identificaben y que viníen naguando por sentir dende cuantaya".

"Foi una plataforma perfecta dende la qu'entamar a texer rede", afirmó Rodríguez. Con too, esplicó que pa que'l discursu que llanzaron Xosé Lluis García Arías, Xuan Xosé Sánchez Vicente y Lluis Xabel Álvarez se convirtiera nun "movimientu cívicu" foi fundamental qu'hubiera un "públicu llatente" que se canalizó al traviés de les páxines de la revista.

"Un públicu que, de mou más o menos consciente, taba aguardando pol surdimientu d'una iniciativa d'eses caracterísques" que "planteara al rodiu del asturianu lo qu'ellos y elles yá sentíen tentativamente". "Un públicu que namás lleer aquel titular de 'Hablemos en bable' pensó qu'eso yera lo que taben esperando que daquién dixere", sentenció Marcos Rodríguez.

EVOLUCIÓN POLÍTICA

L'historiador destacó qu'anque nesa época'l comunismu asturianu mostró "un tradicional desdexu hacia la cuestión rexonal" y reconocía namás como fechu diferencial el calter industrial del territoriu, el PCE sí qu'apoyó la primer manifestación autonomista de la Transición, onde se reivindicó l'autogobiernu y la introducción del asturianu nel sistema educativu.

Asina, según esplicó Rodríguez, la esquierda evolucionó nesa época del rexonalismu económicu al cultural al mostrar "bien ceo un aquel de sensibilidá hacia los elementos identitarios del pueblu asturianu". Una evolución pa la que foi fundamental el trabayu d'asociaciones vecinales y culturales, "que pasín a pasu abrieron la mirada a cuestiones rexonales de calter cultural".

Pa Rodríguez, esto permitió que'l movimientu asociativu contribuyera a "resignificar o dar una proyección nueva a dellos aspectos de la cultura tradicional asturiana", al empar que se xeneraben "inquitúes nueves" ente una mocedá con interés por "iguar una idea novedosa y alternativa de país".

"Diben ser persones con pruyimientos asturianistes que formaben parte d'organizaciones polítiques, sindicales o cíviques les qu'alimentaríen a Conceyu Bable, del mesmu mou qu'estos mesmos individuos diben influyir sobre les sos organizaciones d'orixe, faciendo que calistrare nestes o se reforciaren los esmolecimientos pola cuestión asturianista", indicó Rodríguez.