UVIÉU, 18 Sep. (EUROPA PRESS) -
Milio Rodríguez Cueto gana'l XVII Premiu María Josefa Canellada de lliteratura infantil y xuvenil n'asturianu que promueve la Conseyería de Cultura, Política Llingüística y Deporte. El xuráu del gallardón reconoció la so obra 'La lladrona de nomes' pola "abondanza de recursos estilísticos y llingüísticos colos que se compón una historia protagonizada por una neña y onde se trata'l tema de l'autoestima infantil de manera novedosa nel ámbitu de la lliteratura asturiana".
El Premiu María Josefa Canellada de lliteratura infantil y xuvenil n'asturianu ta dotáu con 6.000 euros, un troféu y la publicación de la obra.
El xuráu, presidíu pol director xeneral d'Acción Cultural y Normalización Llingüística, Antón García, reunióse estI miércoles na Casa del Conceyu de Cabranes y tuvo formáu por Gerardo Fabián Fernández, alcalde de Cabranes; Xosé Anxelu Gutiérrez Morán, ganador de la edición anterior del gallardón; Iris Díaz Trancho, escritora y profesora; Claudia Gutiérrez Lueje, filóloga y profesora; Alonso Zamora, fíu de María Josefa Canellada, y Luis Casteleiro Oliveros, filólogu del Serviciu de Planificación Llingüística, en calidá de secretariu.
El ganador d'esti certame lliterariu, Milio Rodríguez Cueto (Xixón, 1962), ye articulista y autor de narrativa p'adultos y xuvenil. Traductor al asturianu d'obres clásiques, como 'La isla'l tesoro', de R. L. Stevenson, foi ganador de los premios Máximo Fuertes Acevedo d'ensayu (1992 y 1999), Xuan María Acebal de poesía (1999) y del propiu María Josefa Canellada, qu'algamó na so quinta edición col rellatu 'Carne de melandru'.
Andalucía
