La ministra Yolanda Díaz da'l so apoyu a los trabayadores de Saint Gobain y pide implicación mayor al Principáu

UVIÉU 15 May. (EUROPA PRESS) -

La vicepresidenta del Gobiernu y Ministra de Trabayu, Yolanda Díaz mostró esti miércoles el so apoyu a los trabayadores de Saint Gobain depués de la decisión de la compañía de zarrar la planta de Sekurit n'Avilés y indicó que, anque nun tienen competencies na tramitación d'esti Espediente de Regulación d'Empléu, ERE, el Ministeriu "va facer tolo posible pa evitalu". Nesti sentíu, manifestó que va solicitar al presidente asturianu, Adrián Barbón, una xunta p'actuar xuntos. Asina, reclamó-y un respaldu mayor pa "remar toos a favor y evitar lo que nun quieren que pase".

"La situación ye solucionable. Quiero aconceyar col presidente del Principáu porque les competencies principien equí, y si sumamos y actuamos al empar, podemos impidilo. Yo llamento muncho, díxilo a la presidenta y a los miembros del comité, nun tener competencies nesti espediente", manifestó Yolanda Díaz.

Díaz facía estes declaraciones na zona de la factoría y depués de caltener una xunta colos representantes de los trabayadores que tuvo que celebrase na sede d'UXT n'Avilés, al torgar la empresa que se celebrara nes instalaciones.

Dixo la ministra que dende'l Ministeriu van ayudar en tolo que puedan. Indicó que les ferramientes que tienen ye la llegalidá vixente y que tolos servicios técnicos dende'l Ministeriu de Trabayu tán al serviciu d'una causa, que son los trabayadores.

"Tenemos normes llaborales güei que permiten a les empreses que tengan dificultaes nun tener que facer lo que güei la empresa ta faciendo. Y, polo tanto, vamos defender hasta l'últimu minutu que se garantice'l caltenimientu del empléu equí, n'Avilés", afirmó la ministra de Trabayu.

Amás, manifestó qu'hai qu'aprobar la proposición de llei presentada nel Congresu de los Diputaos y qu'esta llogre mayoría abondo "pa que nunca más volvamos falar n'España d'un procesu de deslocalización como güei tamos viendo en Saint Gobain".

Nesti sentíu, insistió en que nun comparten la decisión que ta tomando la empresa nin la causa que ta invocando nesti espediente de regulación d'empreses, porque les razones qu'invoquen "nun son reales". "Tamos énte una multinacional pergrande que tien perimportantes beneficios y que decidió llevar una parte de la unidá de producción a Marruecos y tamién a Rumanía, polo tanto, nun lo compartimos pa nada", manifestó.