Muerre a los 81 años el periodista asturianu José Luis Balbín, míticu presentador de 'La Clave'

MADRID, 23 Jun. (EUROPA PRESS) -

El periodista José Luis Balbín finó esti miércoles en Madrid a los 81 años d'edá. Los sos restos mortales van treslladase a la so ciudá natal, Pravia, según informó la so cuenta oficial en Twitter.

L'asturianu algamó una gran popularidá na Transición cola emisión de 'La Clave', un programa de debate nel que se trataben temes d'actualidá qu'afectaben a la sociedá española acompañáu de la emisión d'una película. Ente los invitaos aparecieron los personaxes más relevante de la dómina como Julio Anguita, Miguel Herrero y Rodríguez de Miñón, Santiago Carrillo o Alfonso Guerra, ente otros.

El formatu, que'l mesmu Balbín creó y presentó, emitióse en TVE ente los años 1976 y 1985, anque más tarde tuvo una segunda etapa n'Antena 3, dende 1990 hasta 1993. El periodista amás dirixó los servicios informativos de Televisión Española ente 1982 y 1983.

En radio, el comunicador tamién destacó col espaciu informativu 'Hora Cero' d'Antena 3 Radio y depués marchó a la Cadena Cope pa incorporase como collaborador de los programes 'La Linterna' y 'La Mañana'. En 1998 volvió a la televisión pública con 'Las Claves', nel qu'entrevistaba a grandes personaxes españoles y estranxeros, y en 2000 fundó'l selmanariu d'información xeneral 'La Clave'.

A Balbín gallardonáronlu en 2015 col Premiu Nacional de Televisión qu'otorga'l Ministeriu de Cultura pol so llabor al mandu de 'La Clave'. Un "foru imprescindible" pal diálogu democráticu con un "formatu bien innovador", según señaló entós el xuráu, qu'abrió "una forma distinta de debate en televisión" y trató "problemes esenciales del ordenamientu constitucional y la convivencia pacífica n'España".