Nel 2025 va renovase'l proyectu museográficu del Arqueolóxicu destináu al Arte Asturianu

UVIÉU 11 Dic. (EUROPA PRESS) -

Nos primeros meses del 2025 va principiar el procesu de renovación integral de la esposición que'l Muséu Arqueolóxicu d'Asturies destina al periodu medieval y en particular al Arte Asturianu.

Yá ta en llicitación el contratu de restauración de toles pieces que se van incorporar a la esposición nueva ampliada y la Conseyería yá dispón d'una partida pa llicitar y axudicar nel 2025 el propiu proyectu museográficu yá ellaboráu.

Asina lo avanzó la conseyera de Cultura, Vanessa Gutiérrez, esti martes na Xunta Xeneral, onde presentó'l proyectu de prespuestu pal 2025 de la cartera. Nel pue vese que l'Arte Asturianu o Prerrománicu va recibir una cantidá asemeyada a la de los últimos exercicios, alredor del mediu millón d'euros, cola que se va encarar el proyectu de construcción de la sienda peatonal ente San Miguel de Lliño y Santa María de Naranco, o'l principiu de l'actuación na cripta de Santa Llocaya de la catedral d'Uviéu, amás d'empezar, yá

Per otru llau, les cueves con arte rupestre paleolíticu van ser oxetu d'un estudiu xeoambiental ambiciosu que va suponer una inversión de 95.000 euros. Amás, van tomase midíes concretes de protección de xacimientos arqueolóxicos, como cierres y otros llabores de seguridá, a les que se destinen 60.000 euros.

Caltiénse la llinia de subvenciones a campañes d'investigación, con 100.000 euros, y increméntense les ayudes a los conceyos d'El Valle Baju de Peñamellera, Cangues d'Onís y Candamu pal caltenimientu de la cueva de La Loja, el dolmen de Santa Cruz y la cueva de San Román, respectivamente, de la que se destina una partida pa documentar espedientes nuevos de protección de xacimientos alcontraos nos últimos años.

Pal plan de castros destínense 280.000 euros, colos que va ser posible el caltenimientu de les llinies de trabayu abiertes nos últimos años en poblaos castreños como los d'El Castriyón de Cuaña, Mouguías, San L.luis, Degaña o Doña Palla, a los que se van incorporar otros nuevos como Taramundi o San Tiso d'Abres.

Amás, vía subvenciones nominatives, van apoyase les investigaciones nos castros de Puntamuyeres (Valdés) y El Chao Samartín (Grandas de Salime), completando asina una política nel ámbitu castreñu que se va complementar cola terminación de la reforma del aula d'interpretación del castru d'El Castriyón de Cuaña, anguaño n'obres, o la rehabilitación de les muralles del castru de San L.luis d'Ayande.

P'acabar col ámbitu arqueolóxicu, van apoyase les escavaciones de Lucus Asturum, en Llanera, y los trabayos d'investigación del castiellu de Gauzón, en Castrillón.

L'arquitectura medieval, románica y gótica, ye oxetu d'atención con intervenciones como la yá empezada en San Pedro d' Arroxo (Quirós) o la que se va acometer na ilesia de Santiago d'Arlós (Llanera). Construcciones civiles d'orixe medieval, como les torres de Peñerúes (Morcín), El Puente d'Arcu (Llaviana) o la torre de Soto (Ayer), van ver tamién ellaboraos nel 2025 proyectos nuevos de restauración-rehabilitación que van empezar a executase nel mesmu exerciciu.

Construcciones d'época moderna, renacentista o barroca, tamién van beneficiase de proyectos de meyora, casu de la ilesia de Santa María de Zarréu de Degaña, la capiya de Santu Medé de Ribadeva, la ilesia de Santa María de Lluanco o la ilesia d'Alguerdo n'Ibias, gracies en dellos casos a convenios de collaboración col Arzobispáu.

Esta collaboración colos propietarios privaos de bienes culturales refléxase nun afitamientu y ampliación del programa anual de subvenciones en materia de patrimoniu cultural, que nel 2025 llega a una cifra global de 1.250.000 euros.