El pergamín fundacional del monesteriu de Corniana vuelve esti sábadu a Asturies nel so milenariu

UVIÉU 13 Nov. (EUROPA PRESS) -

La Conseyería de Cultura, Política Llingüística y Deporte va esponer al públicu esta fin de selmana'l documentu fundacional del Monesteriu de San Salvador de Corniana. Un pergamín, calteníu nel Archivu Históricu Nacional, archivu estatal del Ministeriu de Cultura, que vuelve a Asturies depués de cuasi doscientos años fuera y que recueye la dotación cola que nació'l cenobiu salense.

L'acta fundacional va poder contemplase nel salón d'actos del propiu monesteriu esti sábadu, n'horariu de 11 a 19 hores. Pa la ocasión, depués del actu institucional col que se va inaugurar la xornada, Cultura entamó delles representaciones teatrales na redolada del complexu monásticu y dos videomapping que van valir pa conmemorar el milenariu de San Salvador d'una forma espectacular. Va haber dos sesiones a les 20 hores del vienres y del sábadu.

Depués de mostrase en Corniana, la pieza documental va esponese nel Archivu Históricu d'Asturies, n'Uviéu, hasta'l sábadu 23 de payares.

El documentu firmáu va mil años vuelve a Asturies gracies a la collaboración ente'l Gobiernu d'Asturies y el Ministeriu de Cultura que, al traviés de la Subdirección Xeneral d'Archivos Estatales, ta trabayando p'averar los documentos históricos a los sos llugares d'orixe y consiguir asina conectar el patrimoniu documental col contestu nel que se creó y compartir cola ciudadanía la so memoria documental.

Nesti procesu collaboraron instituciones como DocuLab, de la Universidá d'Uviéu; l'Archivu Históricu d'Asturies; el Conceyu de Salas; l'Arzobispáu d'Uviéu; l'Archivu Históricu Nacional y la Fundación Valdés Salas. Tamién la Delegación de Gobiernu n'Asturies, que coordinó'l dispositivu pa garantizar la seguranza del escritu tanto nos desplazamientos como na so permanencia nel Principáu.

El domingu, a les 12.00 hores y nel Archivu Históricu d'Asturies, va inaugurase la muestra Testamentvm, milenario del monasterio de Cornellana (1024-2024), comisariada pol profesor Miguel Calleja y por Concepción Paredes Naves y Ángel Argüelles Crespo, del Archivu Históricu d'Asturies.

Un percorríu pel patrimoniu documental vinculáu al cenobiu asturianu que la ciudadanía va tener la oportunidá de conocer al traviés de pieces escoyíes con detalle qu'evidencien los usos variaos que les sociedaes del pasáu concedíen a los sos documentos y a los sos archivos.

EL DOCUMENTU MILENARIU

El 31 de mayu de 1024, un pergamín recoyó la dotación fundacional d'un monesteriu nel territoriu de Salas, nel llugar de Corniana. Fundábalu la infanta Cristina, fía de los reis Vermudo II y Velasquita. Con esti actu solemne empezó la historia d'una institución qu'acoyó la vida monástica hasta'l sieglu XIX, y que foi protagonista fundamental de la historia del valle del Narcea a lo llargo de los últimos mil años.

Amás del so interés pa la historia local y la so cronoloxía milenaria, esti documentu destaca pola so tipoloxía, yá que la dotación del monesteriu ye una acción xurídica poco frecuente nesa dómina; distínguese tamién pola so redacción curiada, la so escritura solemne y les sos dimensiones llamatives nun pergamín orixinal que recoyía privilexos importantes al tiempu de fundase'l monesteriu.