UVIÉU, 26 Jun. (EUROPA PRESS) -
El Plenu de la Xunta aprobó esti miércoles una iniciativa presentada y defendida por IX-Convocatoria por Asturies, na que se reclama que'l Ministeriu de Tresportes, Movilidá y Axenda Urbana, responsable de RENFE, garantice más paraes de l'AVE nes Cuenques, estableciendo a lo menos que tanto'l primer tren AVE del día con destín a Madrid como l'últimu del día con llegada a Asturies tengan parada nes sos estaciones de Mieres y La Pola L.lena. La iniciativa tuvo l'apoyu de tolos grupos menos Vox.
Foi la portavoz d'IX-Convocatoria por Asturies, Delia Campomanes, la encargada de defender la iniciativa y recordó que los ciudadanos de les cuenques mineres, y particularmente les de les cuenques del Caudal, siéntense discriminaos y con razón al ver pasar l'AVE depués de toos estos años d'espera, y en particular nel casu de L.lena, que "soportó estoicamente más de venti años les cafiantes obres pa la so execución".
"Depués de too esti tiempu y sacrificiu, esi tren d'alta velocidá nin para nes sos estaciones. Reclamar más paraes del tren d'alta velocidá en Mieres y L.lena nun supón nenguna torga pa naide, nin p'Asturies nin pa Madrid, son malapenes unos minutos que puen ser oru pal futuru, pa l'actividá económica y pa les oportunidaes non yá de dos conceyos sinón del conxuntu de los valles mineros y nun se trata, quiero aclarar, de convertir l'AVE nun cercaníes", indicó Campomanes.
El diputáu socialista, Ángel Ricardo Morales, dixo que'l Gobiernu del Principáu d'Asturies yá reclamó a la compañía una parada en Mieres pa estos servicios y que l'operador se comprometió a estudiar esa posibilidá.
"Ye importante qu'estos pidimientos sían nun marcu de coherencia, entendiendo que toos queremos les paraes solicitaes, pero ensin que'l tren madrugador dexe de selo, porque eso vaciaría de conteníu la so existencia", dixo'l socialista.
La diputada del Grupu Mistu, Covadonga Tomé mostró'l so apoyu a la proposición, al igual que lo fixo'l so compañeru de Grupu, Adrián Pumares, de Foru. Sicasí, Pumares indicó que nun sabe si tuvieron en cuenta variables importantes como que efectivamente "esos trenes tienen que ser competitivos o si se tuvo en cuenta que'l primer tren de la mañana tien que llevar a Madrid lo más ceo posible".
PP Y VOX RECUERDEN QUE "ASTURIES NUN TIEN AVE"
El grupu parllamentariu del PP indicó que la clave d'esta iniciativa ye qu'Asturies nun tien AVE y si lleven a la Xunta esta propuesta ye porque toos saben qu'esi tren nun ye d'alta velocidá.
"Un tren que saliera a alta velocidá de Xixón, técnicamente nun podría parar, si va a la velocidá que tien que dir, ye que nun pue parar y si parara, depués de gastar tolo que gastáramos na vía pa dir a velocidá d'un tren normal, podríen danos un premiu a los más tontos d'Europa", dixo'l diputáu del PP, Pedro de Rueda.
Añadió'l diputáu del PP que'l tramu L.lena-Xixón ta más cerca d'un cercaníes y destacó que la enmienda presentada pol PSOE y refugada por IX demuestra que "nun van pidir la parada en La Pola L.lena, sinón namás la de Mieres". Con tol PP dio'l so apoyu a la iniciativa.
Dende Vox, la so portavoz Carolina López foi mui crítica col grupu proponente. "Nun pue ser más vagos y más demagóxicos. Esta PNL que güei nos presenten nun ye más qu'un copia y pega lliteral, palabra a palabra, coma a coma, d'una declaración institucional nel Conceyu de Mieres", indicó López.
La diputada de Vox pidió que se dexe de falar d'AVE d'una vez por toes porque "l'AVE nunca va llegar a Asturies, nun se va modificar l'anchu de vía porque nun ye obligatoriu pa la UE y, polo tanto l'AVE foi un engañu grande d'esti Gobiernu a tolos asturianos".
Andalucía
