Podemos esixe a Divertia que retire de la programación a Diego 'El Cigala', acusáu d'agresión machista

Suárez fai responsable a l'alcaldesa, como autoridá máxima, si caltién el conciertu

XIXÓN, 19 Nov. (EUROPA PRESS) -

La portavoz de Podemos nel Conceyu de Xixón, Olaya Suárez, criticó esti martes la presencia d'un conciertu de Diego 'El Cigala' na programación del Teatru Xovellanos pal primer semestre de 2025 y esixó la so retirada.

Según una nota de prensa de Podemos, la dirección de Divertia va presentar esti miércoles al Conseyu d'Alministración d'esta empresa municipal la programación na que s'inclúi'l conciertu.

Suárez recordó que'l cantaor ta nestos momentos nun xuiciu penal, acusáu de violencia machista física y sicolóxica contra la so ex muyer, con una petición de 5 años de cárcel de la Fiscalía.

"Nun hai que dixebrar al artista de la obra especialmente cuando falamos de contratación pública", consideró la portavoz de Podemos, que llamó l'atención sobre que "existen cientos de grandes artistes como pa que decida pagase col dineru de la ciudadanía a una persona acusada d'unos fechos pergraves y repulsivos".

Por eso, esixó al presidente de Divertia, Óliver Suárez, "proveniente d'un partíu negacionista de la violencia machista", según ella, que pida "disculpes por plantear esta actuación na programación del Xovellanos y que retire la propuesta enantes de la so votación nel Conseyu d'Alministración de Divertia".

De nun ser asina, insistió que la responsabilidá d'esta contratación va facese estensible "a l'alcaldesa, que ye quien ostenta les competencies d'igualdá d'esti Gobiernu", dixo.

Amás, Suárez alvirtió de que l'actuación yá ta promocionada en prensa y anunciada nel sitiu web de la representación del cantante, polo que se pregunta "hasta qué puntu Divertia ta respetando los sos estatutos y les competencies del so propiu Conseyu d'Alministración".