PP y Foru confíen en que la comisión d'investigación esclarie lo relativo a la minería del carbón nos últimos años

   UVIÉU, 14 Abr. (EUROPA PRESS) -

   El presidente del PP d'Asturies, Álvaro Queipo, y el secretariu xeneral de Foro Asturies, Adrián Pumares, defendieron esti llunes la necesidá d'activar na Xunta Xeneral del Principáu d'Asturies una comisión d'investigación, a raigañu del accidente mineru de Zarréu, nel que cinco operarios finaron y otros cuatro resultaron mancaos.

   Una vegada que la diputada del Grupu Mistu Covadonga Tomé confirmó'l so sofitu a una investigación parlamentaria sobre lo asocedío, tantu Queipo como Pumares aportunaron na conveniencia d'indagar en too lo ocurrío nos últimos años.

   Los dos coincidieron en criticar la comparecencia de la conseyera de Transición Ecolóxica, Industria y Comerciu del Gobiernu asturianu, Belarmina Díaz. Les sos esplicaciones, dixeron, fueron insuficientes.

   "Hai que poner la comisión en marcha lo antes posible", comentó Queipo, que tildó de "llamentable" la comparecencia de Díaz. Dixo que la conseyera confirmó que s'estrayía carbón de forma illegal en mines qu'ella tien la responsabiliad d'inspeccionar.

   El presidente del PP llamentó que pasaren 15 díes dende l'accidente y que'l Gobiernu asturianu nun asumiera nenguna responsabilidá nin diera respuesta dalguna.

   "Queremos saber tolo que asocedió pa que lo que pasó nun vuelva asoceder", señaló, aportunando na necesidá de determinar si esiste na Conseyería un problema endémico" en redol a esti asuntu.

   "Lo del vienres foi un escándalu y una vergüenza", comentó Pumares, que dixo que la falta de respuesta de Díaz vino amás auspiciada pol PSOE asturianu.

   "Tán pasando coses bien rares na Conseyería d'Industria", comentó Pumares, que tamién señaló la necesidá d'esclariar los procedimientos nos que se dan los permisos pa les esplotaciones. "Vamos a chequear a la empresa pero tamién a l'Alministración, y conocer qué falló y quién lo sabía", indicó'l responsable de Foru en relación a los trabayos que va desenvolver la comisión d'investigación.