UVIÉU 10 Jul. (EUROPA PRESS) -
El conseyeru de Fomentu, Cooperación Local y Prevención de Quemes del Gobiernu del Principáu d'Asturies, Alejandro Calvo, destacó esti miércoles el trabayu de l'hasta agora delegada del Gobiernu n'Asturies, Delia Losa, cola que, diz, l'Executivu autonómicu collaboró "llealmente".
"Somos compañeros, amás, y namás puedo tener palabres bones", añadió'l conseyeru en declaraciones a los medios en conociéndose el so relevu na Delegación pola diputada socialista por Asturies nel Congresu y vicesecretaria xeneral d'Acción Política y Institucional de la FSA-PSOE, Adriana Lastra, con un nonamientu que s'espera pa la selmana viniente.
Sobre Lastra, Alejandro Calvo entiende que ye positivu que la posición del Gobiernu d'España n'Asturies tea representada por daquién como ella. "Creo que somos afortunaos n'Asturies", afirma, mostrándose convencíu de que "va suponer un impulsu" y "va dar una interlocución en Madrid privilexada dafechu".
Calvo realizó estes declaraciones enantes de participar n'Uviéu na firma del alcuerdu social y políticu 'Alianza poles infraestructures del Estáu qu'Asturies necesita', nel que faló'l presidente autonómicu, Adrián Barbón.
Preguntáu por esti cambiu na Delegación, el presidente refugó facer declaraciones a la espera de la decisión oficial del Gobiernu d'España, llimitándose a dicir que los dos son estupendes.
Andalucía
