El Principáu diz que l'ayuda pal DRI d'ArcelorMittal queda "en suspensu" y el dineru sigue "enriba la mesa"

UVIÉU 26 Nov. (EUROPA PRESS) -

La conseyera de Transición Ecolóxica, Industria y Desarrollu Económicu del Gobiernu asturianu, Nieves Roqueñí, dixo esti martes que los 450 millones que n'abril de 2023 aprobó'l Conseyu de Ministros en conceutu d'ayuda pa un proyectu na planta d'amenorgamientu directu de mineral de fierro (sistema DRI) n'Asturies "nun sumen" anque la multinacional confirmara que nun va realizar eses inversiones por nun veles rentables entá.

"Esa ayuda ta en suspensu porque nun se firmó pola empresa esa ayuda directa, pero eso nun quier dicir que'l dineru desapareciera; sigue tando enriba la mesa pa cuando se despexen les incógnites", afirmó Roqueñí nunes declaraciones realizaes esti martes.

Esplicó la dirixente asturiana que tuvo falando con dirixentes d'ArcelorMittal esti llunes y esplicáron-y el conteníu del comunicáu que llanzó la multinacional. "Diéronme tranquilidá sobre que siguen cola ruta de descarbonización, eso sí, poniendo per delantre les inveriones nel fornu d'arcu eléctricu", señaló.

Pa Roqueñí, el comunicáu d'ArcelorMittal que señala qu'entá nun se dan les condiciones p'acometer les inversiones en plantes de DRI hai qu'interpretalu como una señal de qu'esperen que se constituya la Comisión Europea.

"Yo creo que va ser una llexislatura na que'l Pactu Verde siga apoyando la transición ecolóxica y dixital, y nesa transición ecolóxica, los proyectos de descarbonización van siguir tando con una fueya de ruta", dixo Roqueñí.