Va impulsar, amás, la protección de les mazcaraes d'iviernu y del teatru costumista
UVIÉU, 12 Mar. (EUROPA PRESS) -
El Gobiernu del Principáu empezó'l procesu pa declarar bien d'interés cultural (BIC) la danza tradicional asturiana, presente en pelo menos 59 de los 78 conceyos de la comunidá.
La Conseyería de Cultura, Política Llingüística y Deporte decidió apoyar la propuesta que parte de Xosé Antón Fernández Martínez Ambás y Ramsés Ilesies Fernández, responsables del Archivu de Tradición Oral d'Ambás.
La conseyera, Vanessa Gutiérrez, destacó qu'esti xéneru, documentáu dende hai sieglos "sigue güei vivu y arraigonáu tanto en contestos rurales como urbanos". La titular de Cultura tamién destacó la necesidá de protexer esta manifestación.
"Ye bien importante pa la nuestra identidá como pueblu y pal porvenir de la nuestra cultura documentar de manera exhaustiva la nuestra tradición, impulsando'l so conocimientu y difusión, especialmente cuando se trata del nuestru delicáu y valiosu patrimoniu inmaterial", afirmaó
Gutiérrez presidió esti martes en Xixón la reunión de la Mesa Sectorial de la Cultura Tradicional, qu'axuntó a cuasi una trentena d'especialistes p'abordar les polítiques que l'Alministración autonómica ha impulsar nesta llexislatura col fin d'acaudaxar la cultura tradicional, protexela y promover el so espardimientu.
Nel alcuentru, la conseyera anunció, amás, que se va proponer próximamente al Conseyu de patrimoniu la declaracion de BIC del teatru costumista y la intención del so departamentu de promover l'espediente de máxima protección del patrimoniu cultural pa les mazcaraes d'iviernu.
Baxo esta denomación encuádrense diferentes ritos festivos d'orixe paganu, tamién llamaos aguilandos, que se celebren tradicionalmente n'Asturies cola llegada del iviernu, especialmente en feches como Nuechebona, Nadal, Añu Nuevu y Reis.
Nestos momentos, perviven mazcaraes como Los Aguilandeiros de San Xuan de Villapañada (Grau), Los Aguilanderos de La Puela Ayande; Los Guilandeiros de Tinéu, Os Aguilandeiros de Xedré (Cangas del Narcea), Os Reises de Tormaleo (Ibias), Os Reises del Valledor (Ayande), el Guirria de San Xuan/San Juan de Beleño (Ponga) y los Sidros y Comedies de Valdesoto en Siero. Pel momentu, solo estos últimos cuenten cola declaración de BIC dende 2017.
ASTURIANADA Y DEPORTE TRADICIONAL
La reunión de la Mesa Sectorial de la Cultura Tradicional permitió repasar dalgunes de les acciones que'l Principáu tien en marcha, como les diferentes llinies de subvenciones a la protección patrimonial o los circuitos culturales. Como novedá, esti añu va ponese en marcha un premiu anual d'asturianada, que se va convocar nos meses vinientes, y va entamar un circuitu cultural nuevu de narración oral pa les biblioteques de los conceyos. Coles mesmes, el día 20 de marzu va conmemorase'l Día de la Narración Oral.
Per otru llau, treslladóse l'estáu de los diferentes espedientes de protección en marcha, como los relativos a la vela llatina, la xota o a les alfombres florales, ente otros. Igualmente, informóse sobre la recién declaración pola Unesco de la treshumancia como patrimoniu cultural inmaterial de la humanidá. La evaluación próxima, prevista p'avientu, va ser la de la candidatura de la cultura sidrera asturiana.
La Comisión Sectorial de Cultura Tradicional va encargase d'evaluar les polítiques que se tán llevando a cabu, al tiempu que va trabayar tamién nel diseñu d'acciones nueves. Por esta razón, van constituyise diferentes grupos de trabayu que van asumir, ente otres funciones, l'análisis de midíes como les subvenciones a la recuperación d'elementos etnográficos de les brañes o'l desenvolvimientu de la Estratexa pal Deporte Tradicional Asturianu, que la Dirección Xeneral d'Actividá Física y Deporte va poner en marcha en collaboración cola Mesa pol Deporte Tradicional. Nesti campu, va ponese especial atención a los bolos asturianos, declaraos bien d'interés cultural inmaterial n'ochobre de 2017.
Andalucía
