El Principáu publica les bases d'ayudes a les esplotaciones agraries

   UVIÉU, 21 Mar. (EUROPA PRESS) -

   El Boletín Oficial del Principáu (Bopa) publica esti vienres les bases reguladores de les ayudes a la inversión n'esplotaciones agraries, nel marcu del Plan Estratéxicu de la Política Agrícola Común (PEPAC) 2023-2027.

   Estes ayudes tienen como oxetivu favorecer la rentabilidá y profesionalización del sector primariu n'Asturies con meyores na so actividá granible. Asina, empresten especial atención a aspeutos como la eficiencia enerxética, el bienestar animal y la meyora de la bioseguridad y la sanidá, según indiquen dende'l Gobiernu autonómicu en nota de prensa.

   La principal novedá d'esta edición ye que les ayudes de planes de meyora divídense en dos categoríes, según les inversiones a les que se dediquen y con distintu grau d'intensidá de l'ayuda.

   D'esta miente, bajo esta normativa regulen trés llínees. Una relativa a ayudes para inversiones en modernización y/o meyora d'esplotaciones agraries. El máximu establezse nun 65% de la inversión elegible. La inversión subvencionable va ser d'hasta 200.000 euros per unidá de trabayu agrariu, con un importe máximu de 800.000 por esplotación, cuando'l titular sía una persona xurídica, y de 400.000 n'otros casos.

   La otra llínea d'ayudes va dirixida a inversiones granibles n'esplotaciones agraries venceyaes a contribuyir a la mitigación-adaptación al cambéu climáticu, usu eficiente de los recursos naturales y bienestar animal. Trátase de planes de meyora medioambiental, que financien inversiones para la meyora de la eficiencia enerxética, en xestión y aprovechamientu de purinos y cuchos, según midíes de bienestar animal. Estes ayudes van poder algamar el 80% de la inversión elegible. La inversión subvencionable va ser d'hasta 200.000 euros per unidá de trabayu agrariu, con un importe máximu de 800.000 por esplotación, cuando'l titular sía una persona xurídica, y de 400.000 n'otros casos.

   Coles mesmes, la tercer llínea d'ayudes va ser para inversiones non granibles n'esplotaciones agraries venceyaes a la mitigación-adaptación al cambéu climáticu, usu eficiente de los recursos naturales y biodiversidá. Trátase de midíes de prevención de daños.

   Como novedá, amparen non solo les inversiones dirigíes a la protección del ganáu y los cultivos frente a la fauna selvaxe (llobu, osu, xabalín, melandru y cérvidos, ente otros) y les especies invasores, sinón tamién les inversiones pa meyora de la bioseguridad y la sanidá de les esplotaciones ganaderes (vallaos, zarros, corraes, dispositivos de geolocalización y videovigilancia y compra de mastines ente otres).

   Tamién cubren inversiones de calter comunal promovies por asociaciones, alministraciones y demás entidaes en mangues ganaderes, infraestructures d'alimentación y suministru d'agua y confinamientu d'animales y, inclusive, centros de llimpieza y desinfección. Estes ayudes van siguir cuntando con un financiamientu del cien per cien de la inversión elegible y un importe máximu de 40.000 euros por esplotación.

   Les trés llínees dan prioridá a la mocedá, nuevos profesionales y les muyeres. Coles mesmes, les ayudes van ser compatibles col plan Incorpórate al Agru, y les subvenciones pa la sucesión d'esplotaciones, qu'apocayá convocó la Comisión Rexonal del Bancu de Tierres por que los beneficiarios opten pola forma de sofitu que más-yos interese.

   Estes ayudes tán sujetes al procedimientu ordinariu de concurrencia competitiva y tramítense acordies con los principios de publicidá, oxetividá, tresparencia, igualdá y non discriminación. Toles solicitúes van ser evaluaes y escoyíes conforme a los principios de selección qu'establecen nel PEPAC 2023-2027.