El Principáu y Red Eléctrica avancen nos planes pa desmantelar la llinia Lada-Velilla

UVIÉU 14 Ene. (EUROPA PRESS) -

El Gobiernu d'Asturies y Red Eléctrica avancen nel diseñu y la planificación del esmantelamientu de la llinia aérea de tresporte d'enerxía eléctrica que conecta Lada, en Llangréu, cola localidá palentina de Velilla.

El proyectu "yá tien l'informe favorable d'impactu ambiental y les autorizaciones afayadices", según indiquen dende l'Executivu autonómicu en nota de prensa.

Responsables de la Conseyería de Transición Ecolóxica, Industria y Desarrollu Económicu y del operador y tresportista del sistema eléctricu aconceyaron pa concretar unos trabayos que van suponer el desmontaxe de los sofitos y les cimentaciones d'una llinia de 66,04 kilómetros que pasa peles provincies d'Asturies, Llión y Palencia.

El tramu asturianu, con un llargor de 52,32 kilómetros, ye'l más estensu y toma seis conceyos: Llangréu, Mieres, Samartín del Rei Aurelio, Llaviana, Sobrescobiu y Casu. El trayectu per Llión y Palencia tien unu llargor de 13,72 kilómetros.

Coles mesmes, el Principáu y Rede Eléctrica principiaron los contactos colos conceyos pa identificar les necesidaes pal desarrollu de los trabayos y los accesos a les zones nes que tán allugaos los sofitos y les estructures de la llinia.

La llinia d'alta tensión de 400 kV Lada-Velilla autorizóse y declaróse d'utilidá pública en 1986, pero nunca entró en serviciu por causes ayenes al Principáu y a Red Eléctrica. L'esmantelamientu ye una petición planteada dende hai años pol Gobiernu d'Asturies y el resultáu d'una collaboración afayadiza ente l'Executivu autonómicu y la empresa.