El Principáu va autorizar matar un máximu de 53 llobos nel plan de xestión añal 2025-2026

   UVIÉU, 8 Abr. (EUROPA PRESS) -

   El conseyeru de Mediu Rural y Política Agraria, Marcelino Marcos Líndez, anunció esti martes que'l programa añal de control del llobu 2025-2026 previstu nel Plan de Xestión del Llobu va autorizar la estracción d'un máximu de 53 llobos na comunidá sobro una población mínima envalorada de 345 exemplares.

   Marcos Líndez aportunó en que l'oxetivu de la midida ye facer compatible la ganadería estensiva col caltenimientu de los cánidos.

   Los períodos pa efectuar los controles fíjense en dos franxes del añu: de xineru a abril y de setiembre a avientu. Sicasí, tamién van ser posibles les estracciones puntuales ente mayu y agostu, en casu d'animales que causen daños repitíos. Durante tol añu podrán realizase estracciones fora de les zones de xestión.

   En cuanto a los métodos previstos, el conseyeru esplicó que s'inclúin los aguardos o recechos pa prindar llobos de manera selectiva per parte de los axentes medioambientales o de personal autorizáu, el sofitu en reserves rexonales de caza -esto ye, la estracción durante caceríes autorizaes d'otres especies- y les batíes per parte d'axentes medioambientales cuando los métodos básicos nun resulten abondos. "Too ello vien bien recoyío y especificao", indicó'l conseyeru.

ZONES DE CONTROL

   Nel programa añal de xestión establécense amás siete zones de control. Van Ser la Zona 1: Noroccidental. Establezse un máximu de seis estracciones, polos elevaos daños causaos nel ganáu: 748 reses afectaos en 2024; Zona 2: El Palu-Esva. Afítase un máximu de seis animales polos numberosos perxuiciu causaos: 768 cabeces de ganáu atacaes en 2024; Zona 3: Suroccidental. Podrán estrayese hasta cuatro exemplares, dao que los daños sobro'l ganáu fueron relativamente baxos: 84 cabeces l'añu pasáu; Zona 4. Centru-occidental. va dexase la estracción d'hasta seis cánidos, dao que los ataques sobro la cabana ganadera aumentaron l'añu pasáu hasta les 425 cabeces; Zona 5: Central. Autorízase la estracción d'hasta ocho llobos, pola medría de daños del añu pasáu, qu'afectaron a 473 reses; Zona 6: Centru-oriental. Autorízase la estracción d'hasta ocho llobos n'un área na que s'estabilizaron los daños, con 292 reses afectaos en 2024 y Zona 7: Picos d'Uropa (fuera del parque nacional). Podrán esaniciase hasta cuatro exemplares.

   Amás establécense unes árees ensin xestión específica. "Nestes zones autorízase la estracción d'hasta once animales, cola posibilidá d'aumentar esti númberu si resulta necesariu", indicó Marcos Líndez.

EL LLOBU TA NEL 83% DEL TERRITORIU.

   Según recuerden dende la conseyería, el llobu ocupa anguaño'l 83% del territoriu asturianu. Los últimos estudios amuesen que'l Principáu cunta con 45 menaes, de les cuales 42 son reproductores, y que la población envalorada sitúase ente los 360 y los 405 animales. Dende 2001, añu nel que se rexistraron 22 menaes, la población amosó una enclín xeneral de crecedera, al igual que los perxuicios causaos sobro la ganadería.

   En 2024 confirmáronse daños en 3.257 cabeces de ganáu bovino, caprino, equín y ovín, lo que supon un aumentu del 19,70% en comparanza con 2021. Amás, el costu de les indemnizaciones amontóse un 96,16% nel mesmu períodu, hasta algamar los 1.538.028 euros l'añu pasáu.

   El borrador del programa añal de control del llobu que güei se dio a conocer, va presentase'l próximu día 10 énte'l comité consultivu, pa firmar la resolución y aprobar definitivamente'l plan que dexe llevar a cabu les estracciones na nuesa rexón.