Piden al PP que se posione énte la sentencia, partíu qu'opta por nun añadir "nada" a les esplicaciones de Foru
XIXÓN, 18 Jun. (EUROPA PRESS) -
Los cuatro grupos municipales de la oposición nel Conceyu de Xixón, PSOE, IX-Más País-IAS, Podemos y Vox, consideraron "mui grave" la sentencia del Tribunal de Cuentes que condena a l'alcaldesa xixonesa, Carmen Moriyón, a devolver más de 31.000 euros que se cargaron al Grupu Municipal de Foru n'otru mandatu nel qu'ella foi rexidora, y que, d'alcuerdu al fallu xudicial, va tener qu'abonar el partíu Foru Asturies.
En rueda de prensa nel Consistoriu xixonés, el portavoz del Grupu Municipal Socialista, Luis Manuel Flórez 'Floro', incidió en qu'a Moriyón condenáronla como responsable d'usu de dineru público "nel so propiu beneficiu" y de realizar pagos "indebíos" con una tarxeta creitu.
Unos fechos "graves, repetíos y calteníos nel tiempu" según el portavoz socialista, que recordó que Moriyón, al marxe del so sueldu d'alcaldesa naquelles feches, cobraba un "sobresueldu" d'unos 1.000 euros. Unos fechos que dixo que nun tienen precedente nel Conceyu y "enxamás na intachable trayectoria de los socialistes".
Por esti motivu, esixó la dimisión de l'alcaldesa, a la que llamó "alumna aventayada" del fundador de Foru Asturies, Francisco Álvarez-Cascos, al que tamién condenaron por fechos similares, según él.
Dixo que ye dalgo que Moriyón yá sabía cuando se presentó'l pasáu añu a l'Alcaldía y cuando "introdució a la estrema derecha na ciudá". Dalgo que demuestra, según él, que Foru nun tien interés na política, namás nel "negociu".
Floro pidió, amás, que devuelva'l dineru y que lo demuestre a la oposición y a la ciudadanía, al marxe de presentar la dimisión. Al empar, encamentó al PP, sociu de Gobiernu de Foru, a que se posicione énte esta sentencia y que cavilgue sobre los fechos polos que condenaron a la rexidora.
Tuvieron acompañando al portavoz socialista la conceyala Carmen Eva Pérez Ordieres y de la Federación Socialista Asturiana (FSA), Noelia Macías, que reclamó al presidente del PP, Álvaro Queipo, nun siguir faciendo lo de siempre y "intentar quedar bien con tol mundu".
"ALCALDESA DE LOS ENGUEDEYOS"
Tamién pidió la dimisión de Moriyón el portavoz d'IX, Javier Suárez Llana, que se refirió a esta, en rueda de prensa, como "l'alcaldesa de los eguedeyos y la fuxida hacia alantre".
Criticó que'l comportamientu que denunció nel so día a Álvarez-Cascos, "el so padre políticu" según él, ye'l mesmu pol que la condenen agora. "Nun ye un error contable", dixo, amás de criticar que nun fixera declaraciones públiques nin asuma l'error.
Destacó que la sentencia fala de "actuación antixurídica y gravemente desdexosa de Moriyón", a lo que preguntó si pue siguir al frente del Conceyu. Puntualizó, amás, que la sentencia ye contra l'alcaldesa de Xixón, cuando exercía eses responsabilidaes, non contra un ciudadanu a títulu individual.
Recordó que la sentencia señala qu'a lo llargo d'un añu cobró un ingresu mensual extra de 1.000 euros dende'l grupu municipal en conceptu de dietes, cantidá mayor al Salariu Mínimu Interprofesional nesos años. A esto sumó otros pagos, como los 500 euros pa un actu de campaña electoral.
"Lo primero que tien que facer l'alcaldesa ye dar la cara, esplicar y pidir esculpes y perdón, y lo siguiente dar un pasu atrás", encamentó a Moriyón, a la que pidió que "ponga orde na so casa y dimita".
Tamién cuntó que'l PP nun pue siguir refugando la so responsabilidá, porque gobiernen con una persona condenada. Por eso, consideró que'l PP va tener que fixar "una posición coherente" colo que diz defender.
Otru partíu que pidió la dimisión de Moriyón foi Vox. La so portavoz municipal, Sara Álvarez Rouco, consideró "pergrave" que l'alcaldesa fuera condergada por gastar dineru público n'asuntos particulares.
"Cómo pue dir pola vida d'alcaldesa honrada sabiendo que diba ser condenada por disponer ilícitamente de fondos ayenos pal so usu particular", preguntóse Rouco, al traviés d'una nota de prensa.
"Nun sabemos si a Carmen Moriyón quéda-y dalgo de vergüenza y puxu, pero si ye asina tien que pidir perdón públicamente a tola ciudá por usar lo ayeno y, depués, dimitir".
"IRREGULARIDAES GRAVES"
La portavoz de Podemos, Olaya Suárez, consideró que lo fecho por Moriyón "nun son errores, sinón irregularidaes graves, y tien qu'asumir responsabilidaes", dixo nuna nota de prensa. "Tendría qu'asumir responsabilidaes y plantease dimitir, porque toi segura de qu'ella lo esixiría a otru nel so llugar", opinó.
Suárez retó a l'alcaldesa a dar la cara y esplicaciones por estos fechos. Tamién encamentó al PP, sociu de Gobiernu de Moriyón, a que se pronuncie sobre esta sentencia.
Preguntáu'l PP sobre esta sentencia, señalóse a Europa Press qu'una vez que dio explicación Foru sobre esti asuntu, nun van añadir "nada".
Andalucía
