El PSOE de Xixón xustifica'l so refugu a la Declaración contra la LGTBfobia al añadir a les persones queer

"Debilita la defensa de los derechos de les persones LGTBI", afirmen los socialistes

XIXÓN, 18 Dic. (EUROPA PRESS) -

El Grupu Municipal Socialista de Xixón argumentó esti miércoles que'l so refugu nel Plenu a la Declaración Institucional promovida pola asociación Xega (Xente LGTBI+) contra les agresiones LGTBfóbicas ye pol cambiu del acrónimu LGTBI pol de LGTBIq+, esto ye, el qu'inclúi a persones queer y otres posibles identidaes.

"L'arrenunciu al acrónimu como escusa pa buscar l'enfrentamientu y non el consensu debilita la defensa de los derechos de les persones LGTBI", opinaron al traviés d'un comunicáu.

Llamenten, nesti sentíu, que "se punxeren per delantre de la protección de la persona agredida intereses desconocíos y incomprensibles pa la mayor parte de la ciudadanía".

Los socialistes dexaron claro que condenen l'agresión homófoba d'un mozu na ciudá'l día 8 d'avientu al que persones yá identificaes trataron de sacar d'un taxi increpándolu con espresiones como "maricu".

Al empar, insistieron en que los avances llexislativos en materia de reconocimientu de derechos pa les persones lesbianes, gais, transexuales, bisexuales y intersexuales vinieron siempre de la mano del PSOE "y asina va siguir siendo", aseguraron, amás de recordar que'l Principáu contempla nel so plan normativu pa esta Llexislatura la ellaboración d'un proyectu de llei pa la garantía de los derechos de les persones LGTBI d'Asturies.

El PSOE insistió nel so apoyu a toles persones que siguen sufriendo dalgún tipu de discriminación o agresión pola so orientación o espresión sexual. Nel so comunicáu, yá adelanten que nes selmanes vinientes van convidar a Xega a caltener una xunta pa "volver atopar la sienda del alcuerdu".