Suatea denuncia la "precarización" del profesoráu d'asturianu, col 85% a mediu xornada a pesar de la demanda

UVIÉU 10 Sep. (EUROPA PRESS) -

Suatea denunció que'l 85% del profesoráu d'asturianu y gallego-asturianu principia'l cursu a media xornada y cuasi na totalidá como interín. Amás, recuerden qu'esta llingua sigue ensin tar presente n'Infantil, lo que según denuncia'l sindicatu significa que'l Gobiernu ta incumpliendo la Llei d'Usu y Promoción del Asturianu.

Al traviés de nota de prensa, Suatea afirmó qu'esti cursu nuevu'l profesoráu d'asturianu y gallego-asturianu "sigue sufriendo la precarización nel so puestu de trabayu" con places a media xornada, que pasen del 69% nel 2015 al 85% d'anguaño.

Una situación que, recuerden, "nun respuende a una merma na demanda d'esta materia voluntaria pol alumnáu y los padres, sinón a criterios economicistes que primen l'aforru perriba la calidá educativa y los derechos del alumnáu a escoyer y recibir llibremente estes enseñances".

Nesi sentíu, denuncien la dificultá pa cubrir places a media xornada en Secundaria nes ales. Por exemplu, el cursu pasáu hubo ocho institutos onde tardaron meses en poner asturianu, mentes qu'en Zarréu (Degaña) tuvieron tol cursu ensin maestru.

"Esti añu detectamos tamién resistencia a ampliar a xornada completa delles places que s'axudicaron como medies, magar que les sos necesidaes horaries son superiores", diz Suatea, que denunció "irregularidaes y falta d'atención que van influir negativamente na escoyeta de l'asignatura".

Otra manera, espliquen que n'Educación Infantil namás s'ufierta asturianu*si al profesoráu de Primariu sobren-y hores, lo que supón "una forma d'actuar contraria a la Llei d'Usu". "Ta claro que nun hai nengún interés por atender a esta etapa educativa básica nel deprendimientu y sobrevivencia d'una llingua", denuncien.

Por eso, soliciten al Principáu acabar coles medies xornaes, una discriminación positiva na elección voluntaria de l'asignatura, reconocimientu de la especialidá docente y concursu de tresllaos, formación del profesoráu, xeneralización de la ufierta en toles etapes educatives y dotación presupuestaria pa l'asignatura.