UVIÉU, 24 Sep. (EUROPA PRESS) -
El turismu tuvo un espaciu nel discursu del presidente del Principáu, Adrián Barbón, nesta primer sesión del Debate d'Orientación Política. La habilitación de la tasa turística municipal y voluntaria; 600.000 euros en bonos de promoción pal turismu rural, la regulación de les viviendes d'usu turísticu, un millón pal fomentu turísticu del patrimoniu industrial o la conmemoración del 40 aniversariu del lema Paraísu Natural, foron dalgunos de los anuncios del Xefe del Executivu nesta materia.
Adrián Barbón destacó que l'oxetivu del so Gobiernu ye'l d'asegurar el modelu turísticu sostenible y de calidá y nesti primer exerciciu de llexislatura, decidieron volver tomar la iniciativa p'asegurar eses dos cuestiones: calidá y la sostenibilidá, emblemes del modelu asturianu.
"Esi ye l'oxetivu de la regulación de viviendes d'usu turísticu y de la habilitación, a partir del añu viniente, d'una tasa de calter municipal y voluntariu. La turismofobia nun existe n'Asturies. Tampoco nun hai una masificación que la xustifique. Dambes afirmaciones son ciertes, pero díbemos facer mui mal si nun supiéramos escarmar en cabeza ayena y entender qué ta pasando n'otres partes d'España. Hai que reaccionar primero que sía tarde", dixo Barbón.
Indicó'l presidente asturianu que cuando se fala de turismu suel recurrise a la espresión qu'encamienta nun matar a la pita de los güevos d'oru y añadió que si'l Principáu nun caltuviera la mariña, agora nun podría mostrala como valor natural nin aprovechala como recursu turísticu.
Y ye que Barbón volvió insistir en que "Asturies ta de moda" y cualquier "análisis sensatu" reconoz que la calidá paisaxística y la biodiversidá son grandes riqueces d'Asturies.
Por eso, indicó que'l Gobiernu que preside tien bien claro que'l provechu particular nunca pue imponese al interés xeneral. "Esti ye l'oxetivu del cambiu de les directrices pa la instalación de parques eólicos; el mesmu que xustifica la regulación de los parques de bateríes. Siempre predomina l'interés xeneral y la visión de conxuntu, el proyectu común. Asina tratamos tamién la revisión de les directrices de comerciu, que va rematar en 2025", dixo.
Andalucía
