El Tribunal Superior de Xusticia de Madrid respalda la oficialidá del topónimu 'Ría del Eo'

UVIÉU 22 Nov. (EUROPA PRESS) -

El Tribunal Superior de Xusticia de Madrid (TSXM) apoya la oficialidá compartida de les denominaciones ría del Eo y ría de Ribadeo y ratifica la validez y la convivencia de dambos topónimos pal estuariu que dixebra Asturies y Galicia.

El órganu xudicial máximu de la Comunidá de Madrid tornó los dos recursos presentaos pol Conceyu de Ribadeo y la Diputación Provincial de Lugo contra la resolución del Institutu Xeográficu Nacional (IXN), de 15 de payares del 2022, pola que s'establecen les denominaciones oficiales de la ría que desagua nel Eo y reconoz la coexistencia de los topónimos ría del Eo y ría de Ribadeo.

Dambos recursos impugnaben una resolución de la Subsecretaría de Tresportes, Movilidá y Axenda Urbana, del 10 de xineru del 2023 que, al empar, desestimaba los recursos interpuestos enantes pol Conceyu de Ribadeo y la Diputación Provincial de Llugo.

"Estes dos decisiones xudiciales refuercien los argumentos históricos, culturales y alministrativos defendíos pol Gobiernu d'Asturies, que demostraron l'usu tradicional y enraizáu del topónimu ría del Eo na marxe asturiana, asina como el so pesu na identidá cultural y llingüística de la comunidá", indicaron dende'l Principáu al traviés de nota de prensa..

El Principáu valora dambos fallos, "que suponen un importante aval al trabayu técnicu y documental rigorosu fechu dende la Conseyería de Cultura, Política Llingüística y Deporte". "Esti esfuerciu foi clave pa demostrar la llexitimidá de la oficialidá compartida, que reflexa la riqueza patrimonial y cultural de la ría, atendiendo a la diversidá histórica y llingüística de la comunidá", afirmaron.

A pesar d'esta meyora significativa, queden entá pendientes dellos procedimientos xudiciales rellacionaos con esta cuestión. Nesti sentíu, l'Executivu autonómicu repite'l so compromisu de trabayar con responsabilidá, defendiendo siempre los intereses d'Asturies dende'l diálogu y el respetu institucional.

"Con una postura firme, el Principáu va siguir promoviendo la protección del patrimoniu cultural y históricu de la comunidá, buscando siempre'l consensu y el reconocimientu de la so identidá", sentencien.