Un tsunami más "altu qu'algunes isles del Pacíficu"

XINEBRA, 11 de Marzu (Reuters/EP)

La Federación de Sociedaes de la Cruz Colorada y la Media Lluna Colorada alvirtió de que'l tsunami provocáu pol terremotu de 8,9 graos que solmenó esti vienres la mariña nordeste de Xapón ye "más altu qu'algunes de les isles" del océanu Pacíficu peles que va travesar.

"La nuesa mayor preocupación ye la rexón d'Asia y Pacíficu, onde los países en víes de desarrollu son claramente los más vulnerables ante esti tipu de desastres", declaró a Reuters dende Xinebra'l voceru de la Federación, Paul Conneally. "El tsunami ye una amenaza importante", añadió. "Pel momentu, ye más altu que delles isles y puede dir derechu hacia elles", añadió.

ALERTA DE TSUNAMI EN TOLA CUENCA DEL PACÍFICU

L'alerta de tsunami pol fuerte terremotu que se produxo esti vienres en Xapón estendióse a tola cuenca del océanu Pacíficu sacante'l territoriu non insular d'Estaos Uníos y Canadá, según informó'l Centru d'Alerta de Tsunamis del Pacíficu d'Estaos Uníos (PTWC, poles sos sigles n'inglés).

L'alvertencia afecta a Hawai y estiéndese tamién a México y los países de Centroamérica y Suramérica que tienen costa nel Pacíficu, según el PTWC.

El xueves de nueche emitióse una alerta de tsunami pa Hawai a partir del terremotu de 8,9 graos na escala de Richter rexistráu xuntu a la costa nororiental xaponesa, de manera que les autoridaes hawaianes ordenaron la evacuación de toles zones costeres.

Según les autoridaes h.awaianes, tol archipiélagu cuerre'l peligru de sufrir daños por un tsunami xeneráu pol seísmu. Ésti ye'l mayor terremotu que se produxo en Xapón dende hai 140 años, y provocó foles de tsunami d'hasta diez metros d'altu qu'arrasaron con campos de cultivu, cases y vehículos, y provocaron incendios.

Prevése que Hawai reciba l'impactu del tsunami a les 3.00, hora llocal. Les sirenes de defensa civil sonaron en tol estáu antes de les 22.00 hores p'avisar a los habitantes.

"Cada cresta de fola puede durar ente 5 y 15 minutos, o hasta más, y inundar les zones costeres", señala l'alvertencia. "El peligru pue caltenese mientres munches hores tres la primer fola porque van llegar otres dempués", añade.

El comunicáu, que tamién indica que los escombros arrastraos pol tsunami podríen amplificar la so fuerza destructiva diz que se deberíen entamar acciones urxentes pa protexer les vides y les propiedaes".

EVACUACIÓN DE HAWAI

L'axencia estatal de defensa civil ordenó que toles árees costeres de Hawai se evacuen antes de les 2.00, hora llocal. Les zones que tienen qu'evacuase inclúin la famosa playa de Waikiki y l'hotel más importante de Honolulu, na isla de Oahu.

Les autoridaes encargaes de xestionar situaciones d'emerxencia tamién encamentaron a los residentes permanecer a una distancia de polo menos 30 metros de les víes fluviales y puertos deportivos conectaos col océanu y llevar los barcos a agües fonderes.