Xandru Martino gana'l Pachín de Melás de testos teatrales con una comedia sobre'l grandonismu

UVIÉU 4 Oct. (EUROPA PRESS) -

Una comedia d'enriedu qu'integra una "crítica social al grandonismu asturianu", 'Subpayaria', del rioseyanu Xandru Martino Ruz, ye la obra ganadora de la segunda edición del premiu Pachín de Melás de testos teatrales n'asturianu que convoca la Conseyería de Cultura, Política Llingüística y Deporte.

Los profesionales qu'integren el xuráu destacaron d'esti trabayu que "se trata d'una comedia d'enriedu que presenta una crítica social al grandonismu asturianu, amás d'a otros grandonismos non menos tóxicos".

El xuráu tuvo presidíu pol director xeneral d'Acción Cultural y Normalización Llingüística, Antón García, y compuestu polos escritores Henrique Facuriella y Chechu García; l'actriz y profesora de la Escuela Superior d'Arte Dramáticu del Principáu d'Asturies Begoña Martínez Cezón; la profesora especialista en Llingua Asturiana Tamara Collar y el ganador de la edición pasada, Dolfo Camilo Díaz. La filóloga adscrita al Serviciu de Planificación Llingüística Laura Marcos actuó como secretaria.

El Gobiernu d'Asturies impulsa'l premiu Pachín de Melás, que ta dotáu con 6.000 euros, pa promover la creación y incentivar la puesta n'escena d'obres de teatru n'asturianu. El premiu recibe'l nome del seudónimu col que conocíen al dramaturgu Emilio Robles Muñiz (Xixón, 1877-1937), fundador de la corriente costumista.

Xandru Martino Ruz (Ribeseya, 1966) ye escritor y miembru correspondiente de l'Academia de la Llingua Asturiana dende'l 2020. Ye autor de les noveles históriques 'Nunn' (2020) y 'Vincitur inimicus' (2022), amás de traducciones del francés al asturianu y de les obres 'Diccionariu básicu ilustráu asturianu-castellanu' (2006) y 'Refraneru temáticu' (2008). Amás, ye collaborador de periódicos como La Nueva España, El Comercio y El Fielato.