UVIÉU, 26 Jun. (EUROPA PRESS) -
La Xunta pola Defensa de la Llingua Asturiana (XDLA) denunció que la Conseyería de Derechos Sociales y Bienestar nun cumple coles instrucciones que establecen los criterios d'uso del asturianu y el gallego-asturianu qu'aprobó'l Principáu n'abril.
Nun apunte nes sos redes sociales recoyíu por Europa Press, la organización denunció que la web nueva d'esta Conseyería ta namás en castellanu, dalgo que contradiz esti documentu aprobáu hai dos meses y qu'indica la forma de proceder de los organismos públicos pa garantizar un tratamientu afayadizu de les llingües propies d’Asturies. "Les instrucciones d'usu del asturianu entren nel conceptu de normalización amable: namás s'usen si se quier", indicó la XDLA.
Les primeres instrucciones qu’establecen los criterios del usu del asturianu y del gallego-asturianu na Alministración autonómica busquen difundir la pluralidá llingüística de la comunidá y dan, según el mesmu Gobiernu, "cumplimientu al compromisu de garantizar los derechos llingüísticos de la ciudadanía y fomentar l’usu de les llingües propies d’Asturies".
Les mesmes establecen establecen pautes pa les xeres cotidianes na Alministración autonómica, por casu, na imaxe corporativa y institucional, l'usu de la toponimia oficial, les publicaciones, los actos públicos o los audiovisuales que promueva’l Principáu. Igualmente, contémplase l'adaptación de les aplicaciones y páxines web qu’incluyan versiones n’asturianu.
Andalucía
