La organización reclama una quexa formal del Gobiernu d'Asturies, a Delegación de Gobiernu y al Ministeriu de Tresportes
UVIÉU, 18 May. (EUROPA PRESS) -
La Xunta pola Defensa de la Llingua Asturiana (XDLA) denunció esti xueves que los lletreros nuevos instalaos pol Ministeriu de Tresportes, Movilidá y Axenda Urbana na N-634 de la que pasa pel conceyu de Piloña nun cumplen cola toponimia oficial d'Asturies.
Asina, según indicaron al traviés de nota de prensa, nos cartelos nuevos puen vese topónimos como 'Campo de Caso', 'Infiesto' o 'Oviedo', en cuenta d'El Campu -única forma oficial dende 2007-, L'Infiestu -única forma oficial dende 2008- y Oviedo/Uviéu, denominación oficial de la capital d'Asturies dende'l 2019.
Pa la XDLA, esto supón "otru despreciu más de la Demarcación de Carreteres n'Asturies, de la Delegación del Gobiernu y del conxuntu del Executivu central hacia al patrimoniu llingüísticu asturianu".
"Too eso cola complicidá del Gobiernu d'Asturies, que s'enchipa de llograr que'l Ministeriu de Cultura publique dalgún cartelín n'asturianu xunto al restu d'idiomes del Estáu pol Día del Llibru, pero qu'asiente y agacha la cabeza mentes que dende Madrid refuguen cuestiones básiques pa la normalización como la especialidá docente d'asturianu o l'usu de la toponimia oficial d'esta tierra", señalaron.
La organización reclamó al Gobiernu d'Asturies una "quexa formal" a la Demarcación de Carreteres, a la delegada del Gobiernu n'Asturies, Delia Losa, y a la ministra de Tresportes, Raquel Sánchez, énte "esti despreciu nuevu a la llexislación asturiana y, en conxuntu, a la cultura y la llingua d'Asturies".
Andalucía
