La Xunta Xeneral acueye la presentación de la versión n'asturianu de 'La ciudá de les neños y los neños', de Tonucci

UVIÉU 27 Nov. (EUROPA PRESS) -

Esti miércoles 27 de payares presentóse na Xunta Xeneral del Principiáu d'Asturies el llibru 'La ciudá de les neñes y los neños', la traducción al asturianu de la obra del psicopedagogu italianu Francesco Tonucci.

Esti volume actualizáu, que fai'l númberu 22 de la coleición Estaya Pedagóxica de l'Academia de la Llingua Asturiana, pon a les neñes y los neños nel centru de les decisiones polítiques de la ciudá, conscientes de que, como diz Tonucci, "si una ciudá ye bona pa les neñes y los neños, va selo pa tola ciudadanía".

Nel actu de presentación participó'l presidente de la Xunta Xeneral, Juan Cofiño; la conseyera d'Educación, Lydia Espina; el vicerrector de planificación estratéxica y coordinación de campus de la Universidá d'Uviéu, Juan Carlos San Pedro; el secretariu de l'Academia de la Llingua Asturiana (ALLA), Xosé Ramón Iglesias, y el Decanu de la Facultá de Formación del Profesoráu y Educación, Celestino Rodríguez.

Pa poner el ramu al actu, dos menores lleeron estractos de la Declaración de los Derechos del Neñu y la Neña, del mesmu autor del llibru, Francesco Tonucci.

Enantes, el presidente del Principáu, Adrián Barbón, caltuvo un alcuentru nel Palaciu de Presidencia con Tonucci, nel que participaron tamién el decanu de la Facultá Formación del Profesoráu y Educación de la Universidá d'Uviéu, Celestino Rodríguez; el secretariu académicu del Departamentu de Ciencies de la Educación de la institución académica, José Luis Belver, y el director del Departamentu de Ciencies de la Educación, Alejandro Rodríguez Martín.