LLIÓN, 10, (EUROPA PRESS)
L'expresidente del Gobiernu José Luis Rodríguez Zapatero refugó la puesta en marcha d'una autonomía pa Llión y propunxo "una solución dientro de la comunidá" que, na so opinión, va tener que pasar per una reforma na que se refuercie'l papel de les diputaciones provinciales.
Fíxolo nel marcu de la ponencia ‘Democracia, ciberseguridá y progresu’, qu'impartió esti miércoles nel claustru del Palaciu de los Guzmanes de Llión, onde, amás, el ministru de Tresformación Dixital y de la Función Pública, José Luis Escrivá Belmonte, rindió-y homenaxe pola creación y puesta en marcha, nel añu 2006, del Institutu Nacional de Ciberseguridá (Incibe).
Pal expresidente la moción aprobada'l mes de xunu pola Diputación de Llión espresa "un latente y históricu sentimientu de necesidá de que se reconoza la identidá de Llión", que, según la posición del exdirigente socialista, "la tien".
"Esta comunidá nun pue tener un esquema de funcionamientu y de gobiernu como cualesquier otra, teniendo nueve provincies y una personalidá distinta como tien Llión. Hai que descentralizar competencies y hai que dar más competencies a les diputaciones, especialmente a la Diputación de Llión", propunxo Zapatero.
Tamién faló de la contorna d'El Bierzu y puntualizó qu'esta "tien tamién una personalidá propia" y que la so institución, el Conseyu Comarcal d'El Bierzu, tien que dotase "de muncho más conteníu y competencies".
Coles mesmes, detúvose "nel problema de la despoblación", dalgo qu'a los sos güeyos tamién motivó la moción, y sobre'l que sorrayó la necesidá de "facer un esfuerciu muncho mayor". Asina, solicitó a la Junta "un plan más activu y más apuestes públiques pol desarollu" nes provincies que sufren esti fenómenu.
"Paezme que la virtú de la moción de la Diputación de Llión ye poner enriba la mesa un sentimientu y que correspuende facer reformes", prosiguió Zapatero, que defendió que la voluntá del PSOE ye "principiar un procesu de debate y de reformes na Comunidá na llinia de reconocer la personalidá de Llión, de descentralizar y d'encarar la despoblación".
Según l'expresidente, si pregunten a los ciudadanos de Llión, estos "quieren ver reconocida la so personalidá y esperanza" dalgo que, al so xuiciu, "pue facese dientro de la comunidá autónoma de Castiella y Llión".
Andalucía
