Antxoa gazteen biomasa 255.434 tonakoa da Bizkaiko golkoan, berehakada txiki baten ondoren

BILBO, 2 (EUROPA PRESS)

AZTI zentro teknologikoak gidatzen duen Juvena kanpainak Bizkaiko golkoko antxoaren eta beste espezie pelagiko batzuen populazioaren 2024. urteko azterketa amaitu du, eta, emaitzen arabera, antxoa gazteen biomasa 255.434 tonakoa da, aurreko urtearekiko beherkada txiki bat izan ondoren. Denbora serie historikoaren barruan balio ertain-baxua du emaitzak, baina 2019ko, 2020ko eta 2021eko balioak baino altuagoa, esaterako.

AZTIko iturriek jakinarazi dutenez, beherakada izan arren, 2025eko arrantza denboraldian erreklutamendua aurreikusteko adierazle positiboak ere badaude: alde batetik, gazteen batez besteko tamaina kanpainen hasieratik erregistratutako bigarren handiena izan da (9,7 cm), eta, bestetik, antxoa helduen biomasa maila altuan mantendu da, 245.825 tonatan, eta, oro har, stockaren egoera osasuntsuaren ebaluazioa indartu egin da.

Eusko Jaurlaritzak sustatuta, AZTIk eta Espainiako Ozeanografia Institutuak koordinatzen dute Juvena kanpaina, Espainiako Gobernuko Arrantza Idazkaritza Nagusiaren babes finantzarioarekin. Erakundeok babes tekniko eta metodologikoa eskaini diote azterlanari, emaitzen zehaztasuna eta arrantza kudeaketan duten erabilgarritasuna bermatzeko.

Aurtengo emaitzek izan duten alderdi nabarmenetako bat izan da antxoa gazteek Frantziako kostaldeko plataforma kontinentalera egin duten lekualdaketa, Kantauriko uretan presentzia minimoa izanik.

"Jokabide horrek eskualdeko baldintza ozeanografiko espezifikoen eragina izan dezake, eta hori funtsezkoa da populazio dinamikak ulertzeko", azaldu du Guillermo Boyra AZTIko arrantza jasangarrien arloko aditu eta kanpaina zientifikoaren zuzendariak.

Lortutako kalkulua joan den astean baliozkotu zen Europako hego-mendebaldeko ebaluazio kanpainak berrikusteko lantaldean. Ondoren, emaitza antxoaren kudeaketarako kontseilu zientifikoan sartu da, hurrengo urterako espeziearen harrapaketa onargarriak zehazteko.

"Kanpainaren emaitzak udaberriko kanpainen datuekin eta antxoaren urteko harrapaketen informazioarekin uztartuko dira, indize sintetiko bat sortzeko. Hortik abiatuta, hurrengo urterako harrapaketa gomendioak egingo dira, arrantza jasangarri eta arduratsua sustatzeko kudeaketa sistema sendo baten bidez", azaldu du Boyrak.

IKUSPEGI EKOSISTEMIKOA

Era berean, Juvena 2024 kanpainak bere ikuspegi ekosistemikoa berretsi du, antxoaren biomasa eta banaketa ebaluatzeaz gain, arrantzarako eta ekologiarako interesa duten beste espezie pelagiko batzuk ere aztertuz.

Gainera, planktonarekiko eta goi mailako harrapariekiko interakzioak ikertu dira kanpainan, 908 itsas ugaztun eta 4.273 itsas hegazti erregistratuz.

Itsas zaborrari dagokienez, 2024an hondakin plastikoen presentziaren gorakada antzeman da, azken urteetan erregistratutako mailen gainetik, hain zuzen ere.