Arabako Aldundiaren aurrekontuen parte izan nahi duten herritarren proiektuak bozkatzeko epea ireki da

GASTEIZ 2 Oct. (EUROPA PRESS) -

Arabako Foru Aldundiaren aurrekontu parte hartzaileen egitasmoaren edizio berria azken fasean dago, eta, asteazken honetatik azaroaren 8ra bitarte, baldintza guztiak bete dituzten eta 2025eko foru aurrekontuen parte izan nahi duten proiektuen alde bozka dezakete arabarrek.

Hala iragarri du asteazken honetan Jone Berriozabal Euskara eta Gobernantzako foru diputatuak Arabako Batzar Nagusien kontrolerako osoko bilkuran. "Arabako aurrekontu parte hartzaileek, lurraldearen eta kuadrillen behar eta lehentasun nagusiak ezartzeko orduan arabarren parte hartze zuzena bilatzeaz gain, beste helburu bat dute: Foru Aldundiaren urteko aurrekontuan gizarte babes handiagoa biltzen duten beharrak sartzea eta lortutako konpromisoen jarraipena egitea", azaldu du.

Ekimena 2022an martxan jarri zenetik, Arabako Foru Aldundiaren 2023ko eta 2024ko aurrekontuek partaidetza prozesu horretatik sortutako bost proiektu bildu dituzte, bi lehen edizioan eta hiru bigarrenean, hain zuzen ere.

Aurten, proiektuak aurkezteko epean 13 proposamen jaso dira, eta, egokiak diren egiaztatzeko eta aurrekontu ildoetan, diru laguntzetan eta foru deialdietan eraginik ez dutela ikusteko azterketa egin ondoren, zortzi proposamenek jarraitu dute aurrera prozesuan; hiru Aiarako Kuadrillakoak dira, bi Añanako Kuadrillakoa, eta bana Gorbeialde, Mendialde eta Arabako Errioxakoak.

"Orain azkenaurreko fasean gaude, hau da, orain arte iragazki guztiak igaro dituzten proiektuak bozkatzeko aukera ematea herritarrei. Lurraldeari eta hemen bizi garenoi hobekuntza kolektiboa ekarriko dieten proposamenen artean bozkatzeko eta hautatzeko unea iritsi da. Epea azaroaren 8ra arte egongo da zabalik", adierazi du Berriozabalek.

16 urtetik gorako herritarrek dute bozkatzeko eskubidea, eta sarean zein aurrez aurre egin daiteke. Bozkatzen dutenek proiektu bakarra aukeratu beharko dute, pertsona hori erroldatuta dagoen kuadrillako proiektuen artean. Pertsona bakoitzak, aukeratzen duen parte hartze kanala edozein izanik ere, behin bakarrik parte hartu ahal izango du. Kuadrilla bakoitzean boto gehien lortzen dituen proposamenak, betiere kuadrillako biztanleriaren %2 gainditzen badu, lekua eta finantzaketa lortuko ditu hurrengo foru aurrekontuetan.