Auzitegiek euskararen normalizazioa eta hizkuntza-eskubideak gutxiesten jarraitzen dutela salatu du Kontseiluak

BILBO 4 (EUROPA PRESS)

Euskalgintzaren Kontseiluak salatu du euskararen aurkako oldarraldi judizialak ez duela etenik izan, 'Oldarraldiaren aurrean, euskararekin bat, euskaraz bat' lelopean 2023ko azaroaren 4an Bilbon 70.000 bat lagun elkartu zituen manifeztaziotik urtebete igaro denean, auzitegiek euskararen normalizazioa eta hizkuntza-eskubideak gutxiesten jarraitzen baitute Araba, Bizkai, Gipuzkoa eta Nafarroan, "gero eta interpretazio murriztaileagoarekin".

Edonola ere, Bilboko martxa egin zeneko urtebete igaro dela-eta astelehen honetan argitaratutako ohar batean, Kontseiluak nabarmendu du "esperantza izpiak" ere ikusi direla, "epai euskarafobo bakoitzeko, herritarren eta afektatutako langileen mobilizazioak" izan direlako, "erantzun irmoak euskararen normalizazioaren defentsan".

Era berean, gogorarazi du hainbat aditu eta juristak luzatu dutela administrazio publikoko hizkuntza-irizpideen paradigma aldatzeko proposamena, Kataluniako zein Galiziako ereduak aintzat harturik, funtzio publikorako sarbidean euskararen ezagutza orokortzeko. "Beraz, bada egungo egoera gainditzeko proposamen gauzagarria. Azken batean, aurre egiteari utzi eta aurrera egiten hasteko garaia da", gaineratu du.

Orobat, euskararen normalizazio eta biziberritzea atzeraldi arriskutik ateratzeko, Kontseiluak ezinbesteko ikusten du hizkuntza-politiketan "jauzi sendo bat" egitea, "premiazko jauzia eragozteaz gain", oldarraldi judizialak "iraganeko eszenatokietara garamatzalako, azken hamarkadetako adostasun politiko eta soziala hautsita".

Alde horretatik ere, Kontseiluak nabarmendu du azken urtebetean Kontseilua ez dela geldirik egon. "Akordio soziopolitiko berri bat bideratzeko konpromisoa hartu genuen iazko azaroaren 4an gizartearekin, eta horretan ari gara buru-belarri 'Batuz Aldatu' dinamika sozialeko talde eragilearen bidez. Dinamika horrek jada badu adostasun sozialaren oinarria norabidetuta: ezagutzaren unibertsalizazioa eta erabilerarako eremu erosoen hedapena", azaldu du.

Bide horretatik, Kontseiluak luze gabe egingo du ekarpen zehatzagoa, euskararen normalizazio eta biziberritzea helburu, eta, horrenbestez, gizarte kohesioa, justizia soziala eta bizikidetza indartzea xede.