Bermeoko Udalak eta Kostarri Kultur Elkarteak hitzarmena sinatu dute Itsuki Irratia berriro abiatzeko

BILBO, 12 (EUROPA PRESS)

Bermeoko Udalak eta Kostarri Kultur Elkarteak hitzarmen bat izenpetu dute Itsuki Irratia berriro ere martxan jartzeko, eta datorren astelehenean, irailaren 16an, herriko jaietako Santa Eufemia eguna dela aprobetxatuz, karpa bat jarriko dute herritarrekin elkarrizketak egiteko.

Ia 37 urteko etengabeko jardueraren ondoren, 2022. urteko urtarrilean behin betiko eten zuen emisioa Itsuki Irratiak, eta orain eraberrituta itzuliko da. Azaldu dutenez, formatu berritzailea izango du, baina lehengo kutsua mantenduta. Hala, bermeotar guztiei zuzendutako programazioa zabaltzen saiatuko dira.

"Hurbileko irratia izango da, euskalduna eta bertoko informazioari lehentasuna emango diona, bertokoei lekua emanik, kutsu herrikoiarekin, herritarrak une oro ondo informatuta egon daitezen eta herriko nortasuna sustatuta", adierazi du Bermeoko alkate Nadia Nemeh Shomalyk.

Hiru ekintzaile bermeotar daude Kostarri Kultur Elkartearen atzean: Josu Urkidi Elortegi, Jon Guarrotxena Layuno eta Ane Gangoiti Fradua. Busturialdeko X. Enpresa Ideia Lehiaketako U-BAI saria jaso zuten iaz, Urdaibaiko berezitasunak eta aniztasuna zabaltzeko podcast bat egiteko ideiarekin. Bada, ideia hori Bermeora ekarri dute orain, eta oinarritzat hartuta, "bertoko informazioa bertoko erara zabaltzea izango dute helburu".

Udal ordezkariak "pozik" agertu dira hitzarmenarekin, horri esker, berriro ere Itsuki Irratia martxan egotea posible izango delako, eta modu horretan, herritarrek beste euskarri bat izango dutelako bertoko informazioa euskaraz jasotzeko.