Bizkai "oparo, jasangarri eta belaunaldi arteko baten" gakoei buruz eztabaidatu dute IV. BBK Trends foroan

BILBO, 7 (EUROPA PRESS)

BBK Trends foroaren laugarren edizioa egin da ostegun honetan Bilboko BBK Salan, eta, hiru elkarrizketa mahaitan ardaztu den topaketan, Bizkai "oparo, jasangarri eta belaunaldi arteko baten" gakoei buruz" eztabaidatu eta hausnartu dute parte hartzaileek.

Arduradunek jakinarazi dutenez, berrikuntzan, hazkundean eta etorkizunaren eraikuntzan joerek duten zeregina aztertzeko foroa da BBK Trends. Elkarrizketa eta hausnarketarako gunea da, eta joeren ekarpena eta Bizkaian duten eragina eta gaitasuna aztertzeko interesa duten pertsona, enpresa eta erakundeentzat irekia.

Aurtengo edizioak lurraldearen erronka eta aukeretan sakondu du hiru elkarrizketa mahairen bidez: Oparotasuna, Jasangarritasuna eta Belaunaldiak. Zenbait diziplina edo jakintza arlotako adituak bildu dira, eta beren ezagutza eta esperientzia partekatu dituzte hainbat ikuspuntutatik, hurbileko ekosistemari begirada berezia eskainiz.

"Joera globalek planetako txoko bakoitzean eragiten duten munduan bizi gara. Eta uste dugu funtsezkoa dela horiei tokian tokiko ikuspegitik heltzea", adierazi du Nora Sarasola BBK-ko Gizarte Ekintzako zuzendariak jardunaldiaren hasiera ekitaldian.

Bere iritziz, "aldaketa etengabea da, eta gure lana aldaketa hori Bizkai berritzaileago, jasangarriago eta inklusiboagorantz gidatzea da. Kontua ez da soilik mundu mailan gertatzen dena behatzea, baizik eta mugimendu horiek gure tokiko errealitatetik interpretatzea, gure bereizgarri diren berezitasun eta indarguneekin".

Horrela, 'Bizkaia Oparoa' izeneko lehenengo mahaiak lurraldea garapen ekonomikotik eta trantsizio energetikotik eraikitzeko moduan jarri du arreta. Guillermo Dorronsoro Zabala Innovation-eko 'management board advisor' eta Deusto Business School ikastegiko irakaslea, Ivan Marten Orkestra Lehiakortasunaren Euskal Erakundeko presidentea, Jose Galindez EKI Fundazioko sortzaile eta presidentea eta Sara Jainaga Sidenorreko Jasangarritasun zuzendaria izan dira parte hartzaileak.

BERDE ETA JASANGARRIA

'Bizkaia Berdea eta Jasangarria' mahaiaren ardatza izan da zelan bultzatu lurralde berde eta jasangarria ingurumena eta klima aldaketa babestuz eta zero kilometoko eta gastronomia jasangarriaren aldeko apustua eginez.

Adela Ucar ingurumen eta jasangarritasunean espezializatutako kazetaria, Aitana Avila La Cocina de Aitxu jatetxeko jabe eta Masterchef 7 telesaioko finalista, Ibon Galarraga Metroeconomica enpresako bazkide eta zuzendaria eta Basque Centre for Climate Change-ko (BC3) senior ikertzailea eta Jon Kortajarena modelo eta aktorea aritu dira solasaldian.

Azkenik, 'Belaunaldien arteko Bizkaia' hirugarren mahaiak belaunaldien arteko lurraldea zelan konektatu izan du hizpide, erronka demografikoaren oinarriak ezarriz eta kultura gizarte kohesioaren eragile nagusitzat hartuta. Elkarrizketa honetan parte hartu dute Ane Pikaza aktore eta ilustratzaileak, Felix Linares kazetariak eta Maitane Alonso ikertzaileak.