Confebaskek Lanbide Heziketa Dual berriaren gakoak azaltzeko gida bat egin du enpresentzat

BILBO, 27 (EUROPA PRESS)

Confebask Euskal Enpresaren Konfederakuntzak Euskadiko Lanbide Heziketa Dual berriko nobedadeei buruzko gida bat plazaratu du enpresei zuzenduta, Lanbide Heziketaren arloan Eusko Jaurlaritzako Hezkuntza Sailarekin duen lankidetza esparruaren barruan. Ikasturte honetan lege esparru berria indarrean sartu denetik egindako aldaketak zehazten dira gidan, modu arin eta errazean.

Izan ere, Confebaskeko iturriek jakinarazi dutenez, 2024-2025eko ikasturtetik, lantokiko prestakuntzako derrigorrezko praktikak desagertzearekin batera, prestakuntza zikloetako ikasle guztiek modalitate dualean egingo dituzte ikasketak. Bi modalitate ezarri dira, orokorra edo trinkoa, hain zuzen ere, iraupenaren, espezializazio mailaren eta ikaslearen eta enpresaren arteko harremanaren arabera.

Enprsa erakundeak euskaraz eta gaztelaniaz egin du gida, eta egungo legearekin nola moldatu jakiteko eta baldintza berrietara egokitu ahal izateko gakoak ematen ditu. Helburua da enpresei lanbide dualeko modalitate berriak ezagutaraztea, gero eta enpresa gehiagok parte har dezaten, langile kualifikatuak sartuz.

Gidak marko berriaren eta orain arte indarrean dagoenaren arteko alderaketa bat ere jaso du, baita prestakuntza dualak enpresarentzat berarentzat zein ikasleentzat dakartzan onuren bilduma bat ere. Hain zuzen, onura horien artean, Euskadiko Lanbide Dualak enpresaren lehiakortasuna hobetzen du, dituen beharretarako berariaz prestatutako talentu gaztea sartzen baita, eta gazteen artean kalitatezko enplegua sustatzen du.

Confebaskek enpresen arteko zabalkunde masiboko kanpaina bat abiatuko du orain Adegi, Cebek eta Sea lurralde erakundeen eskutik, eta, horren osagarri, hainbat kanaletan ere zabalduko du gida, horien artean sare sozialetan.

Informazio gehiago nahi duten enpresak euskal enpresa erakundeetara edo Euskadiko Lanbide Heziketako edozein ikastetxetara jo dezakete.