EAEko esportazioak 2.686 milioi eurokoak izan dira otsailean, iaz baino %2,4 gehiago

BILBO, 22 (EUROPA PRESS)

Euskal Autonomia Erkidegoko (EAE) ondasunen esportazioek urte arteko %2,4ko igoera izan dute otsailean, 2.686 milioi eurora iritsi ondoren, aurreko urteko hilabete bereko 2.624 milioi euroen aldean. Energia produktuen esportazioak %39,9 jaitsi dira, eta ez-energetikoenak %5,8, Eustat euskal estatistika erakundearen datuen arabera.

Lurraldeka, Arabako ondasunen esportazioak %13,1 igo dira otsailean, eta Gipuzkoakoak %1,4; aitzitik, Bizkaiko epsortazioak %5,3 jaitsi dira.

Bestalde, EAEko ondasunen inportazioak 2.329 milioi eurora iritsi dira otsailean, iaz baino %10,0 gehiago. Inportazio energetikoak %24,4 hazi dira, eta ez-energetikoak %5,9. Arabako inportazioak %4,3 hazi dira, Bizkaikoak %14,0 eta Gipuzkoakoak %6,7.

Modu honetan, esportazioen eta inportazioen bilakaerak kontuan izanda, EAEko merkataritza saldoa positiboa izan da martxoan, 356,6 milioi eurora iritsita, eta estaldura tasa %115,3koa izan da.

Esportazioen sailkapeneko lehenengo postuan dagoen herrialdea Alemania da, 414,1 milioi euroko balioa duten ondasunak esportatu baitira otsailean, estaldura tasa %121,0koa izanik.

Alemaniaren atzetik daude Frantzia (387,1 milioi eta 213,4ko estaldura tasa), Erresuma Batua (173,4 milioi eta %348,2ko estaldura tasa), AEB (158,1 milioi eta %88,7ko estaldura tasa) eta Italia (147 milioi eta %138,2 estaldura tasa).

Bost herrialde horiek hartu dute EAEk otsailean egindako esportazio guztien %47,6, eta hiru EB-27koak dira, hau da, EB-27ak esportazio horien %60,3 hartu du.

URTARRILA ETA OTSAILA

Bestalde, EAEko esportazioak %1 gutxitu dira 2025eko lehenbiziko bi hilabeteetan aurreko urteko aldi beraren aldean, hau da, 50 milioi euro gutxiago. Esportazioen zenbatekoa 4.950 milioi eurokoa izan da denera.

Lurraldeka, Bizkaiko esportazioak izan dira EAEko altuenak urteko lehen bi hiletan, 1.731 milioi eurora helduta; Arabakoak 1.645 milioi eurokoak izan dira, eta Gipuzkoakoak 1.574 milioi eurokoak.

2025eko lehen bi hilabeteotako sailkapenean Frantzia izan da herrialde hartzaile nagusia, esportatutako guztizkoaren %15,5 hartuta (767,5 milioi euro); ondoren datoz Alemania (%15,0 eta 741,9 milioi) eta Erresuma Batua (%6,6 eta 328,3 milioi) daude. Horrela, EAEko esportazioen %37,1 hiru herrialde horien artean banatu da urtarrilean eta otsailean.

Halaber, metatutako inportazioak 4.513 milioi eurokoak izan dira EAE osoan 2025eko lehen bi hiletan. Urte arteko alderaketa eginda, aurreko urteko aldi berean erregistratutakoa baino 136 milioi euro handiagoa izan da.

Neurri batean, igoeraren arrazoia Araban metatutako 1.062 milioi euroko inportazioak izan dira, aldi horretarako %16,6ko hazkundea izanda, hau da, 2024ko aldi berean baino 151,2 milioi gehiago. Gipuzkoako inportazioak 85 milioi gehiago hazi dira, (%10,0), guztira 930,6 milioikoak izanik, eta Bizkaian %3,8 jaitsi dira (100 milioi gutxiago), 2.520 milioi eurora iritsiz.

Azkenik, EAEko ondasunen kanpo merkataritzak 437,3 milioi euroko saldo positiboa izan du 2025. urteko lehenengo bi hilabeteetan, eta estaldura tasa %109,7koa izan da.