EAEko txikizkako merkataritzaren salmentak %0,9 gehitu dira urteko hirugarren hiruhilekoan

BILBO, 8 (EUROPA PRESS)

Euskal Autonomia Erkidegoko (EAE) txikizkako merkataritza sektoreak %0,9 handitu ditu salmentak 2022ko hirugarren hiruhilekoan, aurreko urteko hiruhileko beraren aldean, egutegi eraginak atera ondoren eta prezio finkoetan. Gasolina zerbitzuguneak kontuan izan gabe, aldiz, salmentak %1,1 gehitu dira, Eustat euskal estatistika erakundearen datuen arabera.

Aurreko hiruhilekoarekin alderatuta, eta dagozkion urtaro eraginak kenduta, EAEko txikizkako merkataritzaren 2022ko hirugarren hiruhilekoko salmenten indizeari egonkor eutsi zaio, eta hiruhilekoen arteko aldakuntza %0,0koa izan da.

Sektoreen arabera, 2021eko hirugarren hiruhilekoaren aldean, gainerako produktuetan (elikadura gabe) %1,9 egin dute gora prezio finkoetako salmentek aurtengo hirugarren hiruhilekoan; elikagaien salmentak ere gora egin du urte artean, baina neurri txikiagoan, %0,3koa izan baita igoera; automobilgintzarako erregaiaren sektorean salmentak %1,9 igo dira.

Urteko bigarren hiruhilekoarekin alderatuta, urtaro eraginik gabe eta prezio finkoetan, elikagaien salmentek %0,7 egin dute gora, eta gainerako produktuen eta automobilgintzarako erregaien sektoreetan, aldiz, %2,8na egin dute behera.

Elikagaien sektoreko txikizkako merkataritzaren barruan, elikagaietan, edarietan eta tabakoan espezializatutako merkataritzaren salmentak %3,2 jaitsi dira 2021eko hirugarren hiruhilekoarekin alderatuta; elikagaiak, edariak eta tabakoa nagusi diren txikizkako merkataritza ez-espezializatuan, berriz, %2,0 handitu dira salmentak.

Gainerako produktuen txikizkako merkataritzan, 2022ko hirugarren hiruhilekoko salmenten bilakaera ez da homogeneoa izan aurreko urteko hiruhileko beraren aldean. Horrela, etxeko ekipamenduan espezializatutako sektorearen salmentek %5,6 egin dute gora, pertsonen ekipamenduetan espezializatutako sektorean %1,4 eta beste kontsumo ondasun batzuetan espezializatuan %1,3; gainerako produktuak nagusi diren txikizkako merkataritza ez-espezializatuan, berriz, salmentak %6,0 jaitsi dira.

LURRALDEAK

Lurralde historikoen arabera, 2022ko hirugarren hiruhilekoko salmenten indizeak urte arteko %2,9ko igoera izan du Gipuzkoan eta %0,5ekoa Bizkaian; Araban, aldiz, salmentak %2,7 jaitsi dira.

Hiruhilekoen arteko terminoetan, salmenten bilakaera positiboa izan da Gipuzkoan eta Bizkaian, %0,6ko eta %0,1eko igoerak izan baitituzte, hurrenez hurren; aitzitik, Arabako salmentek %1,6 egin dute behera, urteko bigarren hiruhilekoarekin alderatuta.

Bestalde, txikizkako merkataritza sektorean %0,4 igo da okupatuen kopurua EAE osoan 2022ko hirugarren hiruhilekoan, aurreko urteko hiruhileko beraren aldean. Aurtengo bigarren hiruhilekoaren aldean, berriz, langileen igoera %0,7koa izan da.

Azkenik, txikizkako sektorearen salmentak %3,7 igo dira 2022ko lehen hiru hiruhilekoetako metatuan, hiru azpisektoreen ekarpen positiboekin: elikagaietan %0,1 igo dira, gainerako produktuetan %7,1) eta automobilgintzarako erregaian %3,0. Lurraldeka, Gipuzkoan %6,1 egin dute gora salmentak, eta Bizkaian %3,3; Araban, berriz, %0,3 jaitsi dira.