EAEn 12.497 emakume ari dira I+Gn, sektorean dihardutenen %37,2

BILBO, 10 (EUROPA PRESS)

Euskal Autonomia Erkidegoan (EAE) 33.591 pertsona ari ziren 2021ean I+G arloan, eta horietatik 12.497 emakumeak ziren, hau da, sektore horretan lan egiten zutenen %37,2. Azken 18 urteetan, emakumeen presentziak %5,9 puntuko igoera izan du, 2003an %31,3 baitziren, Eustat euskal estatistika erakundeak landutako datuen arabera.

Emakume eta Neska Zientzialarien Nazioarteko Eguna ospatuko da larunbatean, otsailaren 11n, emakumeek zientziaren munduan duten presentziari agerikotasuna emateko helburuarekin. Testuinguru horretan, Eustatek emakumeek esparru horretan duten parte hartzea aztertu du, bai lan arloan, bai bigarren mailako zein unibertsitate irakaskuntzan.

Horrela, 2021ean I+Gn ari ziren emakume gehienak ikertzaileak ziren (8.120); nolanahi ere, kopuru hori gizonena baino askoz txikiagoa zen (14.074). Emakume teknikariak 3.071 ziren (gizonak 5.624), eta laguntzaileen kasuan aldea txikiagoa zen: 1.305 emakume eta 1.390 gizon.

Zientzia diziplinak kontuan hartuta, I+Gn diharduten pertsona gehien bildu zituen jarduera ingeniaritza izan zen, 20.939 pertsona izanik, hau da, guztien %62,3. Horien artean, emakumeak 5.786 ziren (%27,6), hau da, gizonak baino askoz gutxiago (gizonak 15.153 ziren, hau da, %72,4). Emakumeak gizonak baino gehiago diren diziplinen artean, berriz, alderik handiena agertu zuena medikuntza zientzien diziplina izan zen: emakumeak %59,8 ziren (2.860), eta gizonak %40,2 (1.922).

Ildo horretan, eta I+Gren barruan, bioteknologiaren sektorea nabarmendu zen, emakumeak %48 gehiago baitziren. Sektore horretan, 1.501 emakumek (guztien %59,7k) eta 1.015 gizonek (%40,3) ziharduten.

IKASKETAK

Bestalde, unibertsitatean, %54 emakumeak ziren, hau da, 69.933 ikasletik 37.900. Unibertsitatean ikasten zuten emakume guztietatik, 19.867k Gizarte eta Lege Zientzietako ikasketak egiten zituzten, eta horixe zen ikasle gehien bildun zituen adarra (33.623 ikasle).

Zientzia adarreko ikasketak egiten zituzten emakume gehienak (7.140) Osasun Zientzietan matrikulatu ziren; gizonak, berriz, 2.146 baino ez ziren. Ingeniaritza, berriz, ikasle kopururik handiena bildun zuen bigarren adarra eta adarrik maskulinizatuenetako bat zen (16.298 ikasletik 11.666 gizonak dira); Emakumeak, berriz, 4.632 ziren. Azkenik, parekotasunik handiena Zientzien adarrean zegoen: 2.245 emakume eta 2.172 gizon.

Halaber, Lanbide Heziketan, emakumeak %35 ziren, eta, unibertsitatean bezala, gehienek Osasunaren adarra aukeratu zuten (%75,6k). Ikasle kopuru handia bildu zuen beste adar bat Kimika zen; kasu horretan, emakumeak %58,7 ziren. Ikasle gehien bildu zituzten arloen artean, alderik handienak Elektrizitatean eta Elektronikan izan ziren, emakumeak %6,1 baino ez baitziren.

Batxilergoari dagokionez, Zientzien batxilergoan mutilen eta nesken proportzioa oso antzekoa zen (neskak %48,8). Giza eta Gizarte Zientzietako batxilergoen kasuan, aldiz, aldea handiagoa zen, eta
feminizatuago zeuden; zehazki, Gizarte Zientzietan, emakumeak %57,7 ziren, eta gizonak, berriz, %42,3. Era berean, Giza Zientzietan emakumeak %57,7 eta gizonak %42,3 ziren.