EAEn 4.261 haur jaio ziren 2018ko hirugarren hiruhilekoan, aurreko urtekoan baino %3,8 gutxiago

BILBO, 18 (EUROPA PRESS)

Euskal Autonomia Erkidegoan (EAE) 4.261 haur jaio ziren 2018ko hirugarren hiruhilekoan, aurreko urteko aldi berean baino %3,8 gutxiago. Araban izan zen jaitsierarik aipagarriena, 709 haur jaio baitziren, aurreko urteko hiruhileko berean baino %7,8 gutxiago; Bizkaian 2.112 ume jaio ziren, %4,3 gutxiago, eta Gipuzkoan 1.440, %0,9 gutxiago, Eustaten datuen arabera.

Ezkontzaz kanpoko jaiotzak guztien %44,5 izan ziren 2018ko hirugarren hiruhilekoan, aurreko urteko aldi berean %42 izan ziren bitartean. Jaiotza hurrenkeraren arabera, 2.292 haur, guztien %51,4, lehenbiziko haurrak izan ziren iazko udako hiletan, 1.558 aurretik beste bat bazen familietara heldu ziren (%36,6), eta %12,0 hirugarren eta ondorengoak izan ziren.

Jaiotzak amaren adinaren arabera banaturik, 30-34 urteko amen taldea nagusi izan zen berriz, erditzeen %36,7rekin. Talde horren ondotik hurrengo goragoko taldea zegoen, 35-39 urte artekoa (%33,0); 25-29 urteko taldea %13,3 izan zen, eta 25 urtetik beherakoa %6,4. 40 urte edo gehiagoko amen taldeak erditzeen %10,5 ekarri zuen.

Amen batez besteko adina 33,4 urte izan zen, aurreko urteko hiruhileko berekoaren antzekoa, eta honela banatu zen: ama ezkonduena 33,7 urte, ezkongabeena 32,8 eta dibortziatuena, 36,7.

Bestalde, 2018ko uztail, abuztu eta irailean, EAEn amatutakoen arteko %25,8 atzerritarrak izan ziren, aurreko urteko aldi berean %22,9 izan ziren bitartean. Portzentaje hori bakarrik gainditu zen Araban (%32,9); Gipuzkoan eta Bizkaian atzerriko amen proportzioa %24,5 eta %24,3 izan zen, hurrenez hurren. Halaber, amatzeko adina ezberdina izan zen nazionalitatearen arabera: atzerritarrena 30,8 urte batez beste, eta espainiarrena 34,3 urte.