Eguraldia.- Giro fresko eta umela igande honetan

BILBO 20 Abr. (EUROPA PRESS) -

Euskalmet euskal meteorologia agentziaren iragarpenaren arabera, igande honetan, apirilaren 20an, giro fresko eta umelarekin jarraituko dugu. Hodei ugari ikusiko da zeruan eta euria egingo du.

Goizean noizbehinka eta han-hemenka egingo du euria, baina eguerdi inguruan mendebal/ipar-mendebaldeko haizea nagusituko da eta orduan sarriago egingo du euria, batez ere Kantauri isurialdean eta ekialdean. Elur-kota 1.200-1.500 metro inguruan egongo da.

Tenperatura pixka bat gehiago jaitsiko da eta orokorrean 15 gradutik beherako balioak izango ditugu. Hiriburuetan, Baionan 8 gradu espero dira gutxienez eta 15 gehienez, Bilbon 9 gutxienez eta 16 gehienez, Donostian 8 gutxienez eta 15 gehienez, Gasteizen 4 gutxienez eta 12 gehienez eta Iruñean 6 gutxienez eta 13 gehienez.

Itsasbazterrean mendebal-osagaiko haizea ibiliko da, 4ko indarrarekin, eta egunaren erdialdeko orduetan eta arratsaldean ipar-mendebaldekoa nagusitu eta zakartu egingo da, 5eko tarteekin; itsaskia eragingo du, arratsaldean itsaski handiko guneekin.

Ipar-mendebaldeko hondoko itsasoak 2-2,5 metro inguruko olatuak altxatuko ditu, eta gauean 1,5-2 metro ingurukoak. Itsasgorak 09:59an eta 22:36an izango dira, eta itsasbehereak 03:49an eta 16:12an. Uraren tenperatura 14 gradukoa da eta ikuspena bat eta lau kilometro artekoa izango da.