Eguraldia.- Hodeiak eta ostarteak tartekatuko dira larunbat honetan

BILBO 5 Abr. (EUROPA PRESS) -

Euskalmet euskal meteorologia agentziaren iragarpenaren arabera, larunbat honetan, apirilaren 5ean, hodeiak eta ostarteak tartekatuko dira, baina arratsaldean behe-hodeiak ugarituko dira.

Eguna hegoaldeko eta hego-mendebaldeko haize zakarrarekin hasiko da eta epeletik jarraituko du giroak. Eguerditik aurrera haizea baretu egingo da eta iparraldetik finkatuko denez, freskatze aldera egingo du.

Hodeitza aldakorra izango dugu eta litekeena da arratsaldean hodeiak gailentzea; orduan, han-hemenka zaparradaren bat bota dezake eta baliteke zenbait tokitan trumoitsuak izatea.

Tenperaturari dagokionez, hiriburuetan, Baionan 14 gradu espero dira gutxienez eta 18 gehienez, Bilbon 13 gutxienez eta 20 gehienez, Donostian 12 gutxienez eta 19 gehienez, Gasteizen 8 gutxienez eta 17 gehienez eta Iruñean 8 gutxienez eta 19 gehienez.

Itsasbazterrean hego-osagaiko haizea ibiliko da 4ko indarrarekin, goizean hego-mendebala nagusituz, eta eguerdi aldera ahuldu eta ipar-osagaira aldatuko da, 2-3ko indarrarekin; itsaso kizkurra eragingo du, itsaskirriko guneekin.

Mendebaldeko hondoko itsasoak 0,5 metro inguruko olatuak altxatuko ditu. Itsasgorak 11:26an eta 00:02an izango dira, eta itsasbehereak 04:52an eta 17:09an. Uraren tenperatura 13 gradukoa da eta ikuspena hamar kilometrotik gorakoa izango da.