EHUk 2,3 milioi euro jaso ditu Europar Batasunetik, IN-DEEP Europako Doktoretza Sarea koordinatzeko

BILBO 29 Oct. (EUROPA PRESS) -

Euskal Herriko Unibertsitateak (EHU) 2,3 milioi euro jaso ditu Europar Batasunetik, matematikan funtsezkoak diren sare neuronaletara bideratutako IN-DEEP Europako Doktoretza Sarea koordinatzeko. Euskal unibertsitatearekin batera, Europako ospe handiko beste hamar erakundek ere jaso dute dirua, hala nola Turingo Politeknikoak (Italia), Arte eta Ofizioen Goi Eskola Nazionalak (Frantzia) eta Siemensek (Belgika).

EHUko eta Ikerbasqueko iturriek jakinarazi dutenez, IN-DEEP sareak bederatzi doktoregai prestatuko ditu oinarri matematiko sendoa duten sare neuronal sakonak diseinatzeko eta ezartzeko. Sare neuronal horiek hainbat arlotako datuak interpretatzeko aplikatuko dira (adibidez, geofisika, egiturazko monitorizazioa eta medikuntza); datu horiek guztiek deribatu partzialeko ekuazioak dituzte oinarrian.

David Pardo Ikerbasque ikertzaileak zuzentzen du IN-DEEP proiektua. EHUko Zientzia eta Teknologia Fakultateko eta Basque Center for Applied Mathematics (BCAM) zentroko ikertzailea da Pardo, eta egitasmoau garrantzitsua dela nabarmendu du, "bikaintasunezko ikerketa bultzatzeko, industria sektorean lankidetza estrategikoak ezartzeko eta adimen artifizialari eta haren oinarri matematikoei buruzko mailarik altueneko prestakuntza eskaintzeko".

LABORATEGIA

Konpromiso horretatik abiatuta, 2023an Joint Research Laboratory in Applied Artificial Intelligence laborategi espezifikoa sortu zuten Euskal Autonomia Erkidegoan (EAE). Laborategiaren zuzendaria Javier del Ser Tecnaliako eta EHUko ikertzaile, IN-DEEP Doktoretza Sarearen ikuskatzaile eta adimen artifizialean aditua da. Adimen artifizialari buruzko goi mailako ikerketa aplikatua bultzatzea da laborategiaren helburu nagusia, eta horretarako, Euskadira talentua erakartzea, prestatzea eta bertan atxikitzea da giltzarrietako bat.

Testuinguru horretan, graduondoko berri bat antolatu dute, 2025eko martxotik EHUn eskainiko dena: Adimen Artifizial Aplikatua eta bere Oinarri Matematikoak. Europako IN-DEEP Doktoretza Sareko doktoregaientzat eskuragarri egongo da, baita sortu berri den arlo horretan interesa duten ikasleentzat ere. Javier del Serek, David Pardok eta nazioartean ospea duten beste ikertzaile batzuek parte hartuko dute.

"Oinarri matematikoak dituen adimen artifizialaren gaineko ikerketarako eta prestakuntzarako gaitasuna indartzen dituzte IN-DEEP Doktoretza Sareak eta graduondoko berriak. Hala, oso lagungarriak dira Euskadi erreferente gisa koka dadin adimen artifizialaren teknika azalgarrietan, eta eskualdea abangoardiako hezkuntza hub bat bihur dadin", nabarmendu du David Pardok.