EHUk Klaustro saioa egingo du astelehen honetan Errektoretzarako bi hautagaitzak aurkezteko

BILBO 11 Nov. (EUROPA PRESS) -

EHU Euskal Herriko Unibertsitateak Klaustro saioa egingo du astelehen honetan, azaroaren 11n, Bilboko Bizkaia Aretoko Mitxelena aretoan, Errektoretzarako bi hautagaizak aurkezteko. Hain zuzen, Ekonomia Aplikatuko katedradun Eva Ferreirak eta Zuzenbidearen Filosofiako katedradun Joxerramon Bengoetxeak beren programak aurkeztuko dituzte.

Klaustroa balioz eratuko da lehen deialdian, 09:30ean, gutxien dela kideen erdia bertaratu dela egiaztatu ondoren; bestela, 30 minutu beranduago hasiko da, Euskal Herriko Unibertsitateko iturriek jakinarazi dutenez.

Errektorea unibertsitateko agintari akademiko gorena da, eta unibertsitateko kideek hautatzen dute, hautaketa zuzenaz eta sufragio unibertsal, libre, sekretu eta haztatuaren bidez. Errektore izateko hautagaia arduraldi osoan diharduen irakasle-ikertzaile iraunkor doktorea izan behar da eta, gutxienez, izan behar ditu ikerketako hiru seiurteko, irakaskuntzako hiru bosturteko eta lau urteko esperientzia unibertsitate gestioan, kide bakarreko kargu batean. Bi hautagaitzak ostegunean aldarrikatu ziren behin betiko, eta biek gutxienez klaustrokideen %10ek sinatutako bermea jaso zuten bere garaian.

BOTO HAZTATUA

Errektore izateko hauteskundeetan ematen den botoa haztatua da, hau da, unibertsitateko kidego bakoitzari ehuneko bat esleitzen zaio eta, horregatik, hautagaitzen emaitzak ehunekotan ematen dira. Unibertsitatearekin lotura iraunkorra daukaten irakasle doktoreek %56,25ko portzentajea dute, lotura iraunkorra daukaten irakasle ez-doktoreek eta lotura iraunkorra ez daukaten irakasle-ikertzaile doktoreek %8,3koa, gainerako irakasle-ikertzaileek %1,59koa, ikasleek %22,08koa eta teknikariek eta kudeaketako eta administrazio eta zerbitzuetako langileek %12,08koa.

Hauteskunde kanpaina ostial honetan hasi da eta azaroaren 24an amaituko da. Hain zuzen, kanpainaren mugarri nagusietako bat da datorren astelehenean egingo den Klaustroa, hautagaiek beren programak azalduko baitituzte bertan.

Bozkatzeko eguna azaroaren 26a da, eta egun horretan behin-behinean aldarrikatuko da aukeratutako hautagaitza, boto haztatuen gehiengo soila lortzen duena, alegia. Inpugnazioak aurkezteko epea abenduaren 2an bukatuko da, eta ez balego, biharamunean aldarrikatuko litzateke behin betiko errektore hautetsia, hau da, abenduaren 3an.

Botoa emateko eskubidea aldez aurretik erabiltzeko aukera ematen duen boto gordailuaren arabera ere eman ahal izango da, azaroaren 18tik 21era. Errektore berriak sei urteko agintaldi bakarra izango du, egungo lau urtekoaren ordez.