BILBO, 26 (EUROPA PRESS)
Euskal Herriko Unibertsitateko (EHU) gobernu kontseiluak hurrengo sei urteetan euskal unibertsitate publikoa zuzenduko duen errektorearen izendapenarekin amaituko den hauteskunde prozesua onetsi du ostegun honetan Bizkaia Aretoan egiundako bilkuran, eta horrela, Errektoretzarako hauteskundeak azaroaren 26an izango dira, EHUko iturriek jakinarazi dutenez.
Hain zuzen, unibertsitateko gobernu bilerak hauteskundeetarako deialdia egin eta egutegiaren mugarri nagusiak finkatu ditu. Bada, hautagaitzak urriaren 9tik 29ra aurkeztu beharko dira, eta haien behin betiko onartzea azaroaren 7an egingo da. Hauteskunde kanpaina azaroaren 8tik 24ra izango da, eta azaroaren 26an bozkatuko da. Aurretik, azaroaren 11n, Klaustroaren bilkura egingo da, hautagaitzak aurkezteko eta hautagaiek beren programak azaltzeko.
Hautagaitza bat edo bi egonez gero (edo hautagaitza gehiago, horietako batek lehen itzulian jada boto haztatuaren erdia lortzen badu), abenduaren 3an egingo da errektore hautatuaren behin betiko izendapena. Bi itzuli badaude, bigarrenera igaroko dira boto haztatu handiena lortu duten bi hautagaitzak. Bigarren bozketa hori abenduaen 3an egingo litzateke, abenduaren 11n errektorea behin betiko izendatzeko.
Errektorea da agintari akademiko gorena, eta unibertsitateko kideek aukeratzen dute, zuzeneko hautaketa eta sufragio unibertsal libre, sekretu eta haztatuaren bidez. Errektorea aukeratzen da lanaldi osoko irakasle-ikertzaile doktore iraunkorren artean, eta baldintza da gutxienez edukitzea hiru seiurteko ikerketan, hiru bosturteko irakasle lanetan eta lau urteko esperientzia unibertsitate kudeaketan, pertsona bakarreko kargu batean. Hautagaitzek gutxienez klaustrokideen %10en sinadura behar dute.
Errektoretzarako hauteskundeetan da boto sistema haztatua erabiltzen da, hau da, unibertsitateko kolektibo bakoitzak boto ehuneko bat duenez, ehunekotan adierazten dira hautagai zerrenda bakoitzak jasotako babesak. Ehunekoak hurrengo hauek dira: lotura iraunkorreko irakasle doktoreek %56,25, irakasle-ikertzaile ez-doktore iraunkorrak eta lotura iraunkorrik gabeko irakasle-ikertzaile doktoreek %8, beste irakasle-ikertzaileek %1,59, ikasleek %22,08 eta teknikariak eta kudeaketako eta administrazio eta zerbitzuetako langileek %12,08.
PLAZA BERRIAK
Bestalde, EHUko gobernu kontseiluan irakasle laguntzaile doktoreen 27 plaza berri ere onetsi ditu ostegun honetako bileran, gehienak erretiroen programari lotuak. Plazak udazkenean aterako dira lehiaketa publikora, uztaileko gobernu kontseiluan sortutakoekin batera, 90 plaza inguruko deialdi batean, ekainaren amaieran deitu ziren 200 plazei gehitu beharrekoak.
Horrela, 1.000 inguru dira agintaldi honetan deitu diren karrera hasierako plazak (irakasle laguntzaile doktoreak edo, LOSUren aurretik, irakasle atxikiak).
Era berean, irakasle-ikertzaileentzako 2024ko lan eskaintza publikoa ere onartu da. Txanda libreko 174 plaza izango dira (107 plaza irakasle agregatuentzat, 40 plaza irakasle titularrentzat eta 27 plaza I3 edo R3 ikerketa bikaintasuneko ziurtagiria dutenentzat), eta barne promozioko 38 plaza (18 katedra eta 20 irakasle oso).
Eskaintza horretan sartu dira, bai bitartekoek betetako plazak (irakasle iraunkor izateko akreditatuta egonik, gehieneko denbora agortu dutenak irakasle atxikien edo laguntzaile doktoreen kategorietan), bai duela gutxi laguntzaile doktore postua lortu duten ibilbide luzeko pertsonen plazak. Denak sartuko dira urtea amaitu aurretik eginiko deialdian, gobernu kontseiluak ostegun honetako bileran onartutako lehiaketa prozedura betez.
Azken lan eskaintza publikoen ildotik, helburua da lana finkatzeko aukera ematea plazak erregularki betetzen ari diren pertsona akreditatu guztiei (irakasle laguntzaile doktoreak), bi urteko epean akreditatu direnetik.
Eva Ferreira errektorearen iritziz, "irakasle laguntzaile doktoreen plaza berriak eta enplegu publikoaren eskaintza berria onartzeak agerian uzten du EHUko lan baldintzak hobetzeko egiten ari garen eginahala; kasu honetan, irakasle-ikertzaileenak. Irakasle laguntzaile doktoreen plaza berriak onartzeak handitu egingo ditu unibertsitatearen giza baliabideak, eta erraztu egingo die doktore gazteei karrera akademiko egonkorrago eta erakargarriago baterako bidea".
"Bestetik, plazek aukera emango die jada akreditatuta dauden irakasleei beren lanean lehenbailehen finkatzeko. Gure agintaldiaren hasieran geure buruari ezarri genion helburuetako bat izan zen urratsak egitea arlo honetan, lan egonkortasuna hobetuz eta etorkizunerako lan itxaropenak sortuz gure lankideentzat", azaldu du.
Andalucía
