eLankidetzak 39,5 milioi euro banatuko ditu hainbat GGKEren artean 87 proiektu garatzen laguntzeko

BILBO 31 (EUROPA PRESS)

eLankidetza Lankidetzarako eta Elkartasunerako Euskal Agentziak ia 39,5 miloi euro eman dizkie garapenerako gobernuz kanpoko hainbat erakunderi 87 proiektu babesteko 23 herrialdetan. Zehazki, garapenerako lankidetzako, garapen produktibo, prestakuntza eta laguntza teknologikoko, eta gizarte eraldaketarako hezkuntza proiektuak lagunduko ditu.

Laguntzen deialdi hau da eLankidetzaren "ardatz garrantzitsuena", hala funtsei dagokionez, nola sustatzen dituen eragile eta ekintza kopuruagatik. Agentziaren lehentasun estrategikoei jarraikiz, onartutako ekimenen %20 emakumeen ahalduntzera edo desberdintasuna desagertzera zuzenduta daude, %9 giza eskubideen defendatzaileak babestera, eta %20 Saharaz Hegoaldeko Afrikan gauzatuko dira.

eLankidetzatik ziurtatu dutenez, garapenerako lankidetzako proiektuek balio dute pobreziaren aurkako borrokarako eta pobretutako Hegoaldeko herrialdeen tokiko garapenerako prozesuak indartzeko. Bada, azken horietara bideratu dira funts gehienak -31,7 milioi euro inguru-, eta 59 proiektuk jasoko dute diru laguntza. Proiektuak 23 herrialdetan egingo dira, batez ere Guatemala, El Salvador, Peru, Mexiko, Ekuador, Kolonbia, Senegal eta Kongoko Errepublika Demokratikoan.

Garapenerako lankidetzako proiektuak Euskadiko eta Hegoaldeko herrialdeetako erakundeen bidez gauzatuko dira, eta, besteak beste, emakumeen ahalduntzera, genero indarkeriaren aurkako borrokara, herri indigenen eta LGTBI+ pertsonen eskubideen babesera, komunitateen elikagai burujabetzara edo erakundeen sendotzera bideratuko dira bereziki.

Garapen produktibo, prestakuntza eta laguntza teknologikorako ekimenei dagokienez, proiektu bana onartu da Kuban, Bolivian eta Ekuadorren, eta ia milioi bat euro jasoko dituzte.

HEZKUNTZA

Azkenik, gizarte eraldaketarako hezkuntzako 25 proiektu onartu dira, eta 6,6 milioi euro zuzenduko dira haietara. Hezkuntza ekimen gehienak esparru formalean gauzatuko dira, eta, besteak beste, feminismoak eta genero ekitatea, giza eskubideak, migrazioak eta asiloa, edo ekonomia sozial eta solidarioa jorratuko dituzte.

Proiektu gehienak Euskadin egingo dira, eta Hegoaldeko herrialdeetako errealitatearekin lotura izango dute, helburua delako munduko desberdintasunak sortzen dituzten egiturazko arrazoien ulermena sustatzea eta, gizartea eraldatzeko, euskal herritarren inplikazioa eta elkartasunerako konpromisoa bultzatzea.