Euskadiko Orkestrak 'Schumann / Sibelius' kontzertu programa eskainiko du ostiraletik

BILBO, 13 (EUROPA PRESS)

Euskadiko Orkestrak 2024-2025 kontzertu denboraldiko hirugarren programari ekingo dio ostiralean, azaroaren 15ean, 'Schumann / Sibelius' izenburupean, Kristiina Poska zuzendariaren eta Baiba Skride biolin jotzailearen parte hartzearekin.

Lehen emanaldia Donostiako Kursaal auditoriumean izango da, eta hurrengo egunetan ohiko agertokietan izango da euskal orkestra: astelehenean, azaroaren 18an, Gasteizko Jesus Guridi kontserbatorioan; asteartean, azaroaren 19an, Iruñeko Baluarte auditoriumean; ostegunean, azaroaren 21ean, Donostiako Kursaal auditoriumean; eta ostiralean, azaroaren 22an, Euskalduna Bilbao kauregian. Kontzertu guztiak 19:30ean hasiko dira.

Euskadiko Orkestrako iturriek jakinarazi dutenez, Kristiina Poska estoniar zuzendariak gidatuko ditu kontzertuak. Flandriako Orkestra Sinfonikoko titularra eta Letoniako Orkestra Nazionaleko zuzendari gonbidatu nagusia da, eta herrialde baltikoetako musikako egungo espezialistarik handienetakoa. Bere agindupean, "Europa diagonalki zeharkatuko duen programa bat" jorratuko du euskal orkestrak: Frantzian hasi, Alemanian gelditu eta Finlandiaraino helduko dira elkarrekin.

Gabriel Faurerek Maurice Maeterlincken 'Pelleas et Melisande' antzezlanerako egindako musikarekin hasiko dira kontzertuak. Jarraian, Baiba Skride igoko da eszenatokira, 2001ean Belgikako Elizabeth erregina lehiaketa irabazi zuen biolinista letoniarra, Robert Schumannen azken lan handia jotzeko: 'Biolinerako Kontzertua'. Amaitzeko, Jean Sibeliusen '5. Sinfonia' entzungo ahalko da.

Kontzertu guztietarako sarrerak salgai daude, Gasteizko emanaldikoak izan ezik, www.euskadikoorkestra.eus webgunean eta auditoriumetako leihatila eta webguneetan, 10 eurotik aurrera.