Euskal Finantza Aliantza publiko-pribatua eratu dute, legealdi honetan 4.000 milioi euro mobilizatzeko

BILBO, 3 (EUROPA PRESS)

Eusko Jaurlaritzak eta tokiko bederatzi finantza erakundek Euskal Finantza Aliantza publiko-pribatua eratu dute, legealdi honetan Euskal Autonomia Erkidegoaren (EAE) eraldaketa ekonomiko eta industrialerako 4.000 milioi euro mobilizatzeko.

Imanol Pradales Jaurlaritzako lehendakaria buru dela egin da astelehen honetan Bilbon EAEko Gobernuaren eta Euskal BGAE Federazioa, BBVA, Laboral Kutxa, Kutxabank, BBK Fundazioa, Kutxa Fundazioa, Vital, BasqueFik eta Elkargi finantza erakundeen arteko protokoloa sinatzeko ekitaldia.

Protokolo horrekin abiatu da Euskal Finantza Aliantza, Noël d'Anjou Ogasun eta Finantzetako sailburuak eta Mikel Jauregi Industria, Trantsizio Energetiko eta Jasangarritasuneko sailburuak sustatuta.

Ekimena lankidetza publiko-pribatuaren bidez sortu da, "gure finantza ahalmenak bat etor daitezen eta Euskadiren eraldaketa ekonomiko eta industrialaren zerbitzura jar daitezen", Pradalesek esan duenez EAEko ehun bat agintari eta finantza arloko ordezkariren aurrean egindako ekitaldian.

Bere hitzetan, ziurgabetasuneko nazioarteko agertoki batean "barne ekonomia babestuko duten soluzioak bilatzeko" Jaurlaritzak duen erantzukizunetik dator sinatutako konpromisoa. Izan ere, bere iritziz, nazioarteko egungo egoerak eskatzen du "erantzukizunak norbere gain hartzea, indarrak batzea eta gure esku dauden gaitasun guztiak aktibatzea". "Europan eta Euskadin premiaz jardutea eskatzen du", gaineratui du.

Ildo horretan, eta "bizi dugun une historikoak eskatzen dituen apustu zehatz eta irmoen" ildotik, Pradalesek iragarri du Jaurlaritzak abiatu dituela Finantzen Euskal Institutuari 1.000 milioi euroko finantza-ahalmen gehigarria emateko izapideak. Horretarako, 2025eko aurrekontuak aldatzeko lege proiektu bat bidali du Eusko Legebiltzarrera, Finantzen Euskal Institutuarentzako zuzkidura horretarako epe luzeko zorpetzea 1.000 milioi euroan handitzea baimentzeko.

Baliabide horiek EAEren eraldaketa ekonomikoari lotzen zaizkion finantza inbertsioak egiteko soilik erabiliko dira, batik bat teknologia eta industria sektorerako eta eraldaketa horrek eskatzen dituen azpiegitura zientifiko eta energetikoetarako. Era berean, ekintzailetzaren sustapenean eta industria eta ekonomia berrien sorreran lagunduko dute.

BESTE TRESNA BATZUK

Euskal Finantza Aliantza publiko-pribatu berria industria lehiakortasunaren zerbitzura dauden beste tresna batzuei gehitu zaie, hala nola Industriaren Defentsarako Taldeari edo 500 milioi euroko zuzkidura duen 2025eko Industriarentzako Laguntza Planari.

"Draghi txosteneko 'batetik hiru' araua aplikatuta, gure helburua da 1.000 milioi euroko inbertsio publiko hori gai izatea gutxienez 3.000 milioi euro mobilizatzeko kapital eta aurrezki pribatuan, eta, horrela, 4.000 milioi euroko finantza indarra lortzea legealdi honetan", planteatu du Pradalesek.

Hain zuzen, 4.000 milioi euro horiek hiru norabidetan esku hartzeko aukera emango dute: enpresak Euskadin errotzeko operazioetan laguntzea; enpresa hazkunderako aukerak baliatzea, inbertsio, handitze edo eskuratze operazioen bidez; kanpoko kapitala erakartzeko eta proiektu estrategikoak bultzatzeko tresna eta ibilgailu mistoak sortzea.

"Hau lehen urratsa da. Baina ez da urrats bakarra izango", azpimarratu du Imanol Pradalesek. Izan ere, Jaurlaritzak beste ekimen batzuk aktibatzen jarraituko du aiantza berriaren babesean, eta alderdi guztiek konpromisoa hartu dute "indarrak batzeko eta gure herriaren gaurko eta etorkizuneko ongizatearen zerbitzura jartzeko".

HELBURUAK

Sinatutako ekintza protokoloan, alde ezberdinek borondatea adierazi dute euskal industria, enpresa eta teknologiaren arloko sarea errotzeari eusteko eta errotzea areagotzeko, Euskadi inbertsiorako lurralde erakargarri gisa finkatzeko, eta elkarrizketa publiko pribatua hobetzeko, industriaren berrikuntza eta lehiakortasuna indartu daitezen.

Azken batean, Euskal Finantza Aliantza berriak finantza ahalmen propioak aktibatu nahi ditu, "Euskadi Europaren berrindustrializazioaren puntan izan dadin".

Pradalesek gogorarazi duenez, Euskal Finantza Aliantza "ez da hutsetik abiatzen", eta berariaz aipatu du Ekonomia Itunaren potentzialtasuna eta "kontu publikoen kaudimen egiaztatua, nazioartean aitortua".

"Manufaktura kultura eta industria-ehun ireki, berritzaile eta lehiakorra ditugu. Giza kapital zabala eta kualifikatua dugu, eta EAEko finantza sektorea dinamikoa, osasuntsua eta kaudimenduna da. Finantza aliantza honek EAEko kapitala eta aurrezkia mobilizatu nahi ditu, eta kapitala eta kanpoko aurrezkia erakarri herri gisa haz gaitezen", nabarmendu du Pradalesek.