Euskararen arnasguneen garrantzia jendarteratzeko antzezlan bat sortzeko beka sortu dute

BILBO, 21 (EUROPA PRESS)

Eusko Jaurlaritzak, Nafarroako Gobernuak eta UEMAk 'Arnasguneak' antzerki sorkuntzarako beka sortu du. Euskararen arnasguneen garrantzia jendarteratuko duen antzezlana bat sortzea da bekaren helburua, eta horretarako 23.000 euro jasoko ditu irabazleak eta antzezlana 2022ko Azpeitiko Euskal Antzerki Topaketetan estreinatuko du. Egitasmoak jasotzeko epea irekita dago azaroaren 15era arte.

Beka deialdia 'Arnasa Gara' kanpainaren barruan kokatzen da. Eusko Jaurlaritzak, Nafarroako Gobernuak eta UEMAk 2019an sortutako ekimena da 'Arnasa Gara', eta bi helburu nagusi ditu: batetik, udalerri euskaldunek eta euskararen arnasguneek euskarari egiten dioten ekarpena nabarmentzea eta, bestetik, herritarrak arnasguneen garrantziaz jabetzea.

Eusko Jaurlaritzako Kultura eta Hizkuntza Politika Sailetik jakinarazi dutenez, aurtengo kanpainaren muina izango da arnasguneen garrantzia jendarteratzeko berariaz sortutako antzezlana estreinatzea eta herriz herri zabaltzea.

Antzezlana sortzeko beka deialdira edozein antzerki talde aurkez daiteke, oinarrietan zehaztutakoa onartuz gero. Lana euskaraz sortu beharko da eta proposamenak aurkezteko epea azaroaren 15ean amaituko da. Deialdira aurkeztutako lanak aztertu ostean, epaimahaiak abenduaren 3an jakinaraziko du bekaren irabazlea zein izan den.

Irabazleak 23.000 euro jasoko ditu guztira, eta 2022ko apirilaren amaierarako aurkeztu beharko dio oinarrizko gidoia epaimahaiari. Era berean, antolatzaileek ordainduta, Azpeitiko Dinamoa sormen gunea bizpahiru astez erabiltzeko aukera izango du antzerki taldeak, egonaldia, sormenerako espazioa, baliabide teknikoak, lotarako lekua eta otorduak barne.

Bekaren oinarriek zehazten dutenez, talde irabazleak 23.000 euro horiekin ordaindu beharko ditu atrezzoa eta eszenografiaren gastuak, besteak beste. Horrez gain, antolatzaileek zehaztutako lau udalerritan antzezlana doan eskaini beharko du. Antzokirik ez duten herri txikietako emanaldien baldintzak, berriz, antolatzaileek eta talde irabazleak adostuko dituzte.

EMANALDIAK

Behin antzezlana 2022ko azaroan Azpeitiko Euskal Topaketetan aurkeztu ondoren, gutxienez, beste hamar emanaldi lotuko dira, taldearen katxea aintzat hartuta eta herri txikietara moldatuta. Zehazki, oinarrietan eskatzen den kontuetako bat da antzezlana antzokietarako zein areto txikiagoetarako moldatzeko modukoa izatea, euskararen arnasguneak diren herri asko txikiak direlako eta antzokirik ez dutelako.

Oinarrietan gutxienez hamar emanaldi zehazten badira ere, asmoa da antzezlana ahalik eta herri gehienetara zabaltzea, beti ere baldintzak eta egutegia antzerki taldearekin adostuta, haren gaitasunaren eta agendaren arabera.

Antolakuntzak Dinamoa sormen gunearen eta Azpeitiko Udalaren laguntza izan du oinarriak zehazteko, eta epaimahaian ere kide bana izango dute horiek, Eusko Jaurlaritzak, Nafarroako Gobernuak eta UEMAk izendatutako ordezkariekin batera.