GASTEIZ, 24 (EUROPA PRESS)
Gasteizko Udalak lizitaziora atera du Montehermoso Kulturunea Bultzatzeko Plana prestatzeko eta azterketa estrategikoa egiteko aholkularitzako eta laguntza teknikoko zerbitzuaren kontratazioa, EH Bilduk, PSE-EEk eta EAJk aurten adostutako aurrekontu akordioan dagoen ekimenari bide emanez. Bada, 'Oihanederren jarduera birbideratzea' izeneko aurrekontu sailak 250.000 euro zituen, eta zenbateko horretatik 40.000 euro erabiliko dira azterketa fdiagonostikoa egiteko.
Gasteizko Udaleko arduradunek jakinarazi dutenez, aurrekontu sailaren helburua Montehermoso "birpentsatzeko" denbora hartzea, bertan lan egiten duten pertsonekin eta hiriko kulturgintzarekin batera etorkizunera begira izan beharko lukeen noranzkoa zehazteko. "Hau da, Montehermosok nolakoa izan behar duen irudikatzeko eta zehazteko eta horren inguruko lehen ekintzak ezartzen hasteko kontu saila da", azaldu dute.
Horretarako, Montehermoso Kulturunearen azterketa estrategikoa egingo da, teknikariekin, kultur eragileekin eta herritarrekin elkarlanean, eta, horren ondoren, bultzada plana prestatuko da, epe ertain eta luzerako ekintzekin.
Garatu beharreko zereginen artean, egungo egoeraren diagnostikoa eta Montehermoso Kulturunea Bultzatzeko Plana egiteko lan saioak daude. Plan horrek ezarri beharreko neurri zehatz batzuk jasoko ditu, hala nola beka, programa edo egonaldi berriak martxan jartzea, ekipamendua erostea edo jarduera berriak garatzeko espazioak prestatzea.
Kultura eta Hezkuntza zinegotzi Sonia Diaz de Corcuerak nabarmendu du Montehermoso Kulturunea "tokiko artista garaikideek bultzatutako proiektu askoren katalizatzailea" dela, eta artista hasiberrientzat ere "erreferente" izatea lortu duela. "Gaur egun, bere helburuak eta jarduerak tokiko testuinguruko artisten lana ekoizten eta ikusarazten laguntzera eta kalitatezko programazioa ezartzera bideratzen ditu", adierazi du.
Programazio hori lengoaia artistiko garaikide ugarietara zabalik dago eta, horri esker, prestakuntzarako guneak sortzen eta publiko berriak sortzen laguntzen du. "2023ko irailaren 19an, Kultura eta Hezkuntza zinegotzi gisa nire kargua hartu nuenean azaldu nuen moduan, gure asmoa eta konpromisoa da zentro horrek tokiko arte garaikidea bultzatzeko eragile gisa duen zeregina indartzea", esan du.
"BULTZADA SENDOA"
Bestalde, Maider Uriarte EH Bilduko zinegotziaren hitzetan, "Oihaneder Euskararen Etxearekin instalazioak modu partekatuan erabili dituen etapa amaitu ondoren, Montehermoso Kulturuneak bultzada sendoa behar du. Beharrezkoa da, behingoz, tokiko kultur sorkuntzari eta erakusketari eskainitako erreferentzia zentro bihurtzea".
"Horrez gain, sortzaileak eta gizarte kolektibo eta eragileak elkartzeko gune bihurtu behar du, sinergiak sortu ahal izateko. Azken batean, beharrezkoa da Montehermosoren jarduera birbideratzea, kulturarako erreferentziazko gune bihur dadin", adierazi du.
Montehermoso Kulturuneak artea eta kultura garaikidea sustatzen eta zabaltzen ditu, artistak, kultur eragileak eta publikoak elkarrekin lotzen dituzten proiektu propioak ekoitziz, erakutsiz eta zabalduz. Tokiko testuinguruarekin konprometitutako espazioa da, kolektibo artistikoari bere obra ekoizteko eta hedatzeko laguntza eskaintzen diona, kultur eta gizarte eragileei beren proposamenak garatzeko baliabideak ematen dizkiena eta herritarrak programazioan aktiboki parte hartzera gonbidatzen dituena.
Andalucía
