Gipuzkoako Bertsolari Txapelketa irailaren 14an hasiko da, Urretxun

DONOSTIA, 27 (EUROPA PRESS)

Gipuzkoako Bertsolari Txapelketa irailaren 14an jarriko da martxan, Urretxun, hiru hilabete iraungo ditu eta finala abenduaren 14an jokatuko da, Donostiako Illunben. Saio guztietarako sarrerak www.bertsosarrerak.eus webgunean daude eskuragarri dagoeneko.

Txapelketa ostegun honetan aurkeztu da Gipuzkoako Foru Aldundiaren egoitzan, Donostian, eta Asier Azpiroz Gipuzkoako Bertsozale Elkarteko lehendakariak eta Goizane Alvarez Gipuzkoako Aldundiko Kultura, Lankidetza, Gazteria eta Kiroletako diputatuak parte hartu dute, erakunde antolatzailearen ordezkari gisa lehenak, eta erakunde babesle gisa bigarrenak.

Bada, nabarmendu dutenez, 'Gipuzkoa Bertsotan' sailkapen fase "biziaren" ondoren, abiatzeko prest da 2024ko Gipuzkoako Bertsolari Txapelketa. 48 bertsolari ariko dira kantuan, eta Urretxun hasi eta Donostiako finalera bitarte 16 saio jokatuko dira.

Txapelketan kantuan ariko diren 48 bertsolarietatik 34k udaberrian jokatutako sailkapen fasean eskuratu zuten txapelketarako txartela, eta gainontzeko 14 bertsolariek duela bost urteko txapelketan eskuratu zuten txartela. Horiez gain, 16 gai jartzaile, 15 epaile eta laguntzaile ugari izango dira lanean txapelketan.

Guztira, 16 saiok, hiru fasek eta finalak osatuko dute txapelketa: zazpi final zortziren, bost final laurden, hiru finalaurreko eta finala jokatuko dira. Lehen final zortzirena Urretxuko Labeaga aretoan izango da, irailaren 14an, eta Lasarte-Oria, Lazkao, Elgoibar, Hondarribia, Andoain eta Azpeitiko saioekin osatuko dira.

Final laurdenak Eibarren, Errenterian, Azkoitian, Irunen eta Tolosan jokatuko dira, finalaurrekoak Oiartzunen, Zarautzen eta Arrasaten, eta, azkenik, 2024ko Gipuzkoako Bertsolari Txapelketako finala Donostiako Illunben izango da, abenduaren 14an.

'Gipuzkoa Bertsotan' sailkapen fasean bezala, Gipuzkoako Bertsolari Txapelketan ere lurraldeko lehen bertso eskolaren 50. urteurrena izango da gogoan. Saio guztietako sarrerak salgai daude www.bertsosarrerak.eus webgunean, eta, ohi bezala, Bertsozale Elkarteko bazkideek eta gazteek prezio berezia izango dute.