'II. Mugikortasun Azoka: ikasketak, boluntariotza eta lana atzerrian' egingo da aste honetan Bilbon

BILBO 18 Mar. (EUROPA PRESS) -

GAZ Bilbao Bilboko Udaleko gazteen emantzipazioari laguntzeko zerbitzuak 'II. Mugikortasun Azoka: ikasketak, boluntariotza eta lana atzerrian' antolatu du ostegunerako eta ostiralerako, martxoaren 20rako eta 21erako, La Perrera eraikinean. Jardunaldiak "aukera paregabea" izango dira lanagatik edo ikasketengatik beste herrialde batzuetara joan nahi duten gazteentzat.

Iaz egin zen ekimenaren lehenbiziko edizioa eta parte hartzea "oso handia" izan zen. Helburua da gazteei Euskaditik kanpo dauden lan, boluntariotza eta ikasketa aukeren berri ematea, antolakuntzatik jakinarazi dutenez.

Ostegunean 10:00etatik 14:00etara eta 16:00etatik 18:30era izango da topaketa, eta ostiralean 10:00etatik 14:00etara. 18 eta 30 urte bitarteko gazteei zuzendutako programak eta bekak dituzten entitateen laguntzarekin, parte hartzaileek hainbat stand bisitatu ahalko dituzte mugikortasun baliabide bakoitzari buruzko informazio zuzena lortzeko.

Era berea, bertaratutako gazteek gaur egun dauden aukerekin lotutako gaiak jorratuko dituzten hitzaldi eta mahai inguruetan parte hartzeko aukera izango dute.

Itxaso Erroteta Bilboko Udaleko Gazteria eta Kiroleko zinegotziak azaldu duenez, "mugikortasun programek kultura berriak ezagutzeko eta norberaren garapen pertsonal eta profesionalerako ezagutza, trebetasun eta gaitasun aproposak eskuratzeko aukera ematen dute. Azokara joatera animatzen zaituztet, beken eskaintza, Europako boluntariotza programak edo gainerako Erasmus programazioa bertatik bertara ezagutzeko".

Programa eskaintzarekin parte hartuko duten entitateen artean daude Europe Direct Bizkaia, Bizkaiko Foru Aldundia, Eures, Step Language Services S.L., Basque Trade & Investment, Aiesec in Bilbao, ESN Bilbao, Fulbright Espainia-AEB Batzordea, Kiribil Sarea, Novia Salcedo Fundazioa, Unesco Etxea, DAAD, Bizkaia Gara eta Otxarkoaga Prestakuntza Zentroa.