Ikerbasqueko ikertzaileek 47 milioi euroko funtsak lortu dituzte 2024an

BILBO, 16 (EUROPA PRESS)

Ikerbasque Zientziaren Euskal Fundazioko ikertzaileek 2024an lortutako funtsen guztizko zenbatekoa 47 milio eurokoa izan da, hau da, aurreko urtean baino bi miloi euro gehiago.

Bere arduradunek asteazken honetan iragarri dutenez, Ikerbasquek 45 ikertzaile erakarri ditu 2024an bederatzi herrialdetatik, eta guztira 35 herrialdetako 402 profesional: 201 ikertzaile kontsolidatu, 112 gazte promesa eta 89 'Research Associate' (aurreko bi kategorien maila ertaina).

Egituraketa horrek "bikaintasun zientifikoa sendotu" eta ekoizpen zientifikoa bultzatu du, Ikerbasque ikertzaileek 1.553 artikulu argitaratu baitituzte 2024an nazioarteko eragin handiko indexatutako aldizkarietan.

Finantzaketari dagokionez, Ikerbasqueko ikertzaileek 47 milioi euro erakarri dituzte 2024an, aurreko urtean baino bi miloi euro gehiago. Kanpoko finantzaketarekin landutako 1.321 proiektutatik 30ek ERCren finantzaketa izan dute (European Research Council, Europako Ikerketa Kontseilua). Halaber, 1.643 pertsonak lan egin dute Ikerbasqueko ikertzaileek zuzendutako taldeetan.

Era berean, ikertzaileek 41 'spin-off' sortzen lagundu dute; enpresa ekimen horien jardueraren oinarria prozesu, produktu edo zerbitzu berrien ustiapena da, ikerketetan lortutako ezagutzatik eta emaitzetatik abiatuta.

Ikerbasquek Euskal Autonomia Erkidegoko (EAE) unibertsitate eta I+G zentroetan lan egiteko erakarri dituen mundu osoko ikerzaileak 35 herrialdetakoak izan dira 2024an. Gizonak dira nagusi (%68), emakumezkoen %32aren aldean.

Ikertzaileen jakintza arloei erreparatuta, %44 zientzia esperimentalen arloko espezialistak dira, %26 medikuntza zientzietakoak, %16 ingeniaritza arlokoak eta %14 giza eta gizarte zientzietako adituak.

Ikerbasqueko ikertzaileak munduko zentrorik ospetsuenetatik heldu dira, hala nola MIT, Harvard, Oxford eta Stanfordeko unibertsitateetatik edo CNRS edo Max Planck elkarteetatik.

Ikerbasqueko arduradunen arabera, "2024an lortutako emaitzen harira esan daiteke Euskadi zientziaren arloko Europako erreferentetzat posizionatu dela". "Nazioartean, Euskadi ikerketa aurreratuko eskualdea dela aitortzen dute dagoeneko, nazioarte mailako euskal ikerketa taldeei eta bertan nazioarteko kategoriako ikerketa garatzeko eskaintzen diren baldintza egokiei erreparatuta", azaldu du.

Horren adibide bezala, aipatu dute Europako Batzordeak Ikerbasqueren ikertzaileak erakartzeko programa sei aldiz izendatu duela garapen zientifikoa bultzatzeko Europako ekimenik onena. Orain arte, Ikerbasqueko programek 28 milioi euro lortu dituzte Europako Batasunetik.

HELBURUKO ZENTROA

Helburuko zentroei dagokienez, Ikerbasqueko 130 ikertzaile EHU Euskal Herriko Unbertsitatean ari dira lanean, eta gainerako 272 ikertzaileak Deustu eta Mondragon unibertsitateetan eta ikerketa zentroetan.

Hain zuzen, ikerketa zentro horien artean daude Eusko Jaurlaritzako Zientzia, Unibertsitate eta Berrikuntza Sailaren menpeko BERC (Basque Excellence Research Centre) bikaintasunezko bederatzi ikerketa zentroak eta ikerketa korporatiboko zentroak.

Horiei guztiei, Bioaraba, Biobizkaia eta Biogipuzkoa, eta Azti, Neiker, Tecnalia, Tecnum (Nafarroako Unibertsitatea), Globernance eta IISL/IISJ gehitu behar zaizkie. Guztira, EAEko 25 unibertsitate eta ikerketa zentro profitatzen dira nazioarteko ikertzaileen erakarpenaz.